"Eşitmə və nitq məhdudiyyətli şəxslərə sosial yardim" İctimai Birliyi, Azərbaycan Respublikası Prezidenti yanında QHT-lərə dəstək şurasının dəstəyi ilə keçirilən 3 aylıq "Əlillərin yaradıcılıq potensialının üzə çıxarılması və sərgilərin təşkili " layihəsinin yekunu olaraq, rayon Mədəniyyət Mərkəzində əlillərin əl işlərindən ibarət "Dəstək ol" bədii hissəli satış sərgi təşkil edib.
Tədbiri giriş sözü ilə açan birliyin sədri Cəmilə Abdulova bildirib ki, sərgidə rəsm əsərləri, səbətlər, muncuqdan düzəldilmiş ev üçün bəzək əşyaları, tətbiqi sənət işləri, zinət əşyaları, tikişçilik və toxuculuq işlərindən ibarət 25 nəfərin 100-ə yaxın əl işi satışa çıxarılıb.
C.Abdulova qeyd edib ki, sərginin keçirilməsində məqsəd əlilliyi olan gənclərin cəmiyyətdə bərabər hüquq və imkanlara malik olduğunu bir daha nümayiş etdirmək, bu insanların əsərlərinin satış-sərgisini təşkil edərək onlara maddi dəstək olmaq, əlilliyi olan istedadlı insanların gələcək fəaliyyətlərini inkişaf etdirmək üçün onlara stimul verməkdir
Daha sonra çıxış edən Abşeron RİH-in əməkdaşları-Tofiq Abdullayev, Kərim Kərimov və Sumqayıt Regional Mədəniyyət və Turizm idarəsinin baş məsləhətçisi və Abşeron rayon üzrə nümayəndəsi İlham Manafov belə sərgilərə həmişə dəstək verməyə hazır olduqlarını söyləyiblər. Bildirib ki, bu sərginin keçirilməsində əsas məqsəd fiziki məhdudiyyətli insanlara həm maddi, həm də mənəvi dəstək olmaqdır.
Sərginin bədii hissəsində eşitmə və nitq məhdudiyyətli uşaqlar şeirlər söyləyib, musiqi nömrələri ifa ediblər.
Tədbirdə əl işlərinə görə fərqlənən əlillərə İctimai Birlik tərəfindən fəxri fərmanlar verilib.
Sonda insanlar satış-sərgidə nümayiş olunan əl işlərinə baxıb, həmçinin yaradıcılıq nümunələrini almaqla, əlillərə maddi dəstək göstəriblər.
Şamo Əliyev
