Bakı Mühəndislik Universitetində (BMU) 2017-2018–ci tədris ilinin açılış mərasimi keçirilib. Tədbirdə universitet kollektivi ilə yanaşı, ali məktəbin Himayəçilər Şurasının üzvləri, Milli Məclisin deputatları, Abşeron rayonun rəhbərliyi, iş adamları və valideynlər iştirak ediblər.
Tədbirdə BMU-nun rektoru, professor Havar Məmmədov yeni dərs ili münasibətilə tədbir iştirakçılarını təbrik edib, onlara uğurlar arzulayıb.
Rektor bu il ilk tələbə qəbulunu həyata keçirən Bakı Mühəndislik Universitetinə 17 mühəndislik ixtisası ilə yanaşı, iqtisadiyyat və idarəetmə ixtisasları üzrə də qəbul həyata keçirdiyini bildirib. Qeyd olunub ki, hazırda universitetdə 4526 tələbə təhsil alır. Bunlardan 3944 bakalavr, 525 magistr, 57 nəfər isə doktorantura pilləsində oxuyur. Dövlət İmtahan Mərkəzi tərəfindən aparılan 2017-2018-ci tədris ili üzrə qəbulda 772 nəfər bakalavr ixtisaslarını, 161 nəfər isə magistr ixtisaslarını seçib. Bunlardan da 115 nəfər 600-dən, 253 nəfər isə 500-dən çox bal toplayıb. Universitetdə 44 nəfər Prezident təqaüdçüsü təhsil alır.
BMU-nun Himayəçilər Şurasının üzvü, “Azərikimya” İstehsalat Birliyinin Müşahidə Şurasının sədri, Milli Məclisin deputatı Muxtar Babayev yeni dərs ili münasibətilə təbriklərini çatdırıb, mühəndislik ixtisaslarının ölkəmizin inkişafındakı rolundan danışıb. O, tələbələri universitetdə olan yüksək potensialdan istifadə etməyə, mütəxəssis kimi yetişərək sənayenin inkişafına töhfə verməyə səsləyib.
Abşeron Rayon İcra Hakimiyyətinin başçısı İradə Gülməmmədova Prezident İlham Əliyevin təhsilə olan xüsusi diqqət və qayğısından söz açıb. Rayonun təhsildə qazandığı nailiyyətləri qeyd edən icra hakimiyyətinin başçısı BMU-nun tələbələrinə uğurlar arzulayıb.
Tələbələri təbrikə gələn özəl sektor nümayəndələri BMU ilə əməkdaşlığa xüsusi önəm verdiklərini qeyd ediblər.
Sonda yüksək balla BMU tələbəsi adını qazanmış tələbələrə universitet və şirkətlər tərəfindən hədiyyələr təqdim olunub.