Bu gün Xırdalan şəhəri Heydər Əliyev adına mərkəzdə Abşeron Rayon İcra Hakimiyyətinin təşkilatçılığı və rayon Gənclər və İdman İdarəsinin dəstəyi ilə keçirilən “Kompüter İnformatika kurslarının” məzunlarına sertifikatların təqdim edilməsi mərasimi keçirilib.
Toplantıda Abşeron Rayon İcra Hakimiyyəti başçısının müavini – İctimai-siyasi və humanitar məsələlər şöbəsinin müdiri Fuad Cəbrayılov, Abşeron rayon Gənclər və İdman İdarəsinin rəisi Əsgər Əmirəliyev, tədris kurslarının rəhbəri Şamo Əliyev, eləcə də tələbələr iştirak edib.
F.Cəbrayılov bildirib ki, Abşeron rayon icra hakimiyyətinin başçısı İradə Gülməmmədovanın təşəbbüsü ilə hər il düzənlənən bu layihənin məqsədi rayonda yaşayan şəhid ailələri, əlillər və imkansız ailələrin övladlarına informasiya-kommunikasiya texnologiyaları sahəsində biliklərə yiyələnməsinə və məşğulluğunun artırılmasına nail olmaqdır. F.Cəbrayılov kompüter kurslarına cəlb olunanların sayının çox olması məqsədi ilə elanların zəruriliyini vurğulayıb. Gənclərə ilk addımlarında xeyir-dua verərək, qeyd edib ki, rayonda gənc və istedadlı kadr bazasının olması olduqca vacib amillərdən biridir və İcra Hakimiyyəti gənclərə dəstək məqsədi ilə onların işlə təmin olunmasında yerli sahibkarlarla görüşlər təşkil edəcək.
Abşeron rayonunda keçirilən ödənişsiz kompüter kurslarına görə Abşeron rayon İcra Hakimiyyətinin başçısı İradə Gülməmmədovaya dərin ehtiramını bildirən Ə.Əmirəliyev, ulu öndərin adını daşıyan möhtəşəm sarayda gənclərlə birgə bu cür kursların keçirilməsini ümummili liderin gənclərlə bağlı siyasətinə verilən bir səs kimi qiymətləndirib. Belə layihələrin gələcəkdə inkşaf etdirilməsini və daha da təkminləşdirilməsini arzu edən Ə.Əmirəliyev tədris kursu ilə əlaqədar gənclərin yalnız müsbət sədalarını eşitdiyinə görə növbəti kurslara start verilməsində əlindən gələni əsirgəməyəcəyini bildirib.
Tədris kurslarının rəhbəri Ş.Əliyev bu kursların Abşeron Rayon İcra Hakimiyyətinin başçısı İradə Gülməmmədovanın təşəbbüsü ilə ilk öncə imkansız insanlar üçün yaradıldığını bildirib. Hazırda mərkəzdə yalnız adıgedən kurslar deyil, rəssamlıq, smart sinif, elektron kitabxana, fotostudiya və s. kimi kabinetlərin xidmət göstərdiyini deyib. Tədris kursunun buraxılış sinifinin ofis proqramları, dizayn proqramları kimi əlavə proqramlara da yiyələndiyini qeyd edib. Birgə layihənin davam etdirilməsini dəstəkləyən kurs rəhbəri bu cür hazırlıqların gələcəkdə intellektual cəmiyyətin formalaşmasına təkan olmasını qeyd edib.
Daha sonra kursu müvəffəqiyyətlə başa vurmuş 20 tələbəyə sertifikatlar təqdim olunub, xatirə şəkilləri çəkdirilib.
Tural Kazımlı