Abşeron rayonu ilə Qəlyubiyyə vilayəti arasında uğurla davam edən qardaşlıq və tərəfdaşlıq siyasəti iki ölkənin əməkdaşlığını daha da möhkəmləndirir. Azərbaycanın iqtisadiyyat naziri, Azərbaycan Respublikası ilə Misir Ərəb Respublikası arasında Hökumətlərarası İqtisadi, Texniki və Elmi əməkdaşlıq üzrə Müştərək Komissiyanın həmsədri Şahin Mustafayevin rəhbərlik etdiyi nümayəndə heyəti Misirdə səfərdə olub.
Azərbaycan nümayəndə heyətinin tərkibində Abşeron rayon İcra Hakimiyyətinin Memarlıq və tikinti şöbəsinin müdiri Akif Əliyev də iştirak edib.
Səfərin ilk günü Azərbaycan nümayəndə heyəti Azərbaycan parkına gələrək ulu öndər Heydər Əliyevin burada ucaldılan abidəsini ziyarət edib, önünə gül dəstələri düzüb.
Nümayəndə heyəti Azərbaycan parkı və parkda fəaliyyət göstərən kitabxana ilə tanış olub, kitabxanaya ölkəmiz haqqında kitab bağışlayıb.Qonaqlar həmçinin Abşeron RİH-in daxili imkanları hesabına parkda həyata keçirilmiş əsaslı yenidənqurma və bərpa işləri ilə də tanış olublar.
Sonra nazir Şahin Mustafayev və nümayəndə heyətinin üzvləri Qəlubiyyə vilayətinin qubernatoru Məhəmməd əl Əşməui ilə görüşüblər. Görüşdə Azərbaycan-Misir əlaqələrinin uğurla davam etdiyi, əməkdaşlığın inkişafı üçün geniş imkanların olduğu vurğulanıb, ölkələrimizin regionları arasında əlaqələrin genişləndirilməsinin önəmi diqqətə çatdırılıb, regionlararası əməkdaşlıq məsələləri müzakirə edilib.
Toplantıda A.Əliyev 2007-ci ildə Qalubiyyə ilə Abşeron rayonunun qardaşlaşması barədə protokolun imzalanmasını xatırladaraq, sənədin bütün müddəalarının uğurla yerinə yetirildiyini bildirib. Abşeronda Azərbaycan-Misir dostluq parkı, Xırdalan şəhərinin mərkəzində Qalubiyyə küçəsi, Misir-ərəb təmayüllü məktəb, Qalubiyyədə isə Heydər Əliyev Parkı, Azərbaycan küçəsi və ölkəmizin birinci vitse-prezidenti Mehriban Əliyevanın adını daşıyan məktəbin olması iki ölkə arasında dostluğun əyani təzahürü kimi qiymətləndirilib.
Görüşdən sonra A.Əliyev və bir qrup rəsmi şəxslər Qalubiyyə vilayətində Azərbaycan Respublikasının Birinci vitse-prezidenti Mehriban xanım Əliyevanın adını daşıyan məktəbi də ziyarət ediblər. Təhsil müəssisəsinin rəhbərliyi ilə görüşdə, məktəbdə mövcud vəziyyət, təlim-tərbiyə prosesinin təşkili ilə maraqlanılıb, müəllimlərin təklifləri dinlənilib, diskussiya aparılıb.
Şamo Əliyev