Müşavirədə Respublika Baş Prokurorluğunun və 11 rayonun prokurorluğunun əməkdaşları iştirak ediblər.Zona müşavirəsinin iştirakçıları ilk öncə ulu öndərin abidəsini ziyarət edərək önünə gül-çiçək dəstələri düzdülər. Rayon prokurorluğunda keçirilən zona müşavirəsini respublika Baş Prokurorluğunun Təşkilat-analitik idarəsinin rəisi, III dərəcəli dövlət ədliyyə müşaviri Müqəddəs Sultanov açdı.
Zona müşavirəsinə qatılan rayon və şəhər prokurorları və əməliyyat işçiləri qarşısında 2018-ci ilin 6 ayı ərzində Baş Prokurorluq tərəfindən aparılan genişmiqyaslı tədbirlərdən danışdı. Həmçinin dövlətin və cinayətkarlığa qarşı mübarizə sahəsində olan ictimai maraqların, insan hüquq və azadlıqlarının müdafiəsi üzrə görülmüş işlərin vəziyyətinə dair geniş məruzə ilə çıxış etdi. Eyni zamanda Azərbaycan Respublikasının Prezidenti İlham Əliyev cənablarının rəhbərliyi ilə ölkədə əldə edilən yeni uğurlardan, davamlı ictimai- siyasi sabitlik və dinamik sosial-iqtisadi inkişafdan, regionların sosial-iqtisadi inkişafına dair dövlət proqramının uğurla həyata keçirilməsindən, dövlət rəhbərliyi tərəfindən prokurorluğa göstərilən etimad və diqqətdən, bu kontekstdə əməkdaşların öz xidməti vəzifələrinə daha böyük məsuliyyətlə yanaşmasından, prokurorluqda son illərdə aparılan köklü islahatlar və yeniləşmə proseslərindən danışdı.
Natiq eyni zamanda ölkə başçısının siyasi iradə, əzm və qətiyyəti hesabına korrupsiyaya qarşı mübarizə sahəsində ölkədə görülən işlərdən faktların dili ilə danışaraq, baş tutan islahatların, təşkilati və institusional tədbirlərin səmərəliliyinin artmasını razılıqla vurğuladı. Həmçinin, buraxılan nöqsanlardan da yan keçmədi, öz işində yol verdiyi nöqsanlara görə cəzalandırılan prokurorluq işçiləri barədə də bilgi verdi.
Respublika Baş Prkurorluğunun Təşkilat-analitik idarəsinin rəisi Müqəddəs Sultanov məruzəsi ətrafında Abşeron rayon prokuroru Rahib Seyidov və digər rayon və şəhər prokurorları hesabat xarakterli çıxışlar etdilər. Bununla da, prokurorluq işçilərinin zona müşavirəsi öz işini yekunlaşdırdı.
Qeyd edək ki, regional müşavirədə Abşeronla yanaşı, Sumqayıt şəhər , Quba, Qusar, Xızı, Xacmaz, Siyəzən,Şabran, Qubadlı, Zəngilan və Şuşa rayon prokurorluqlarının əməkdaşları, eyni zamanda Respublika Baş Prokurorluğunun idarə rəisi Ramil Məcidov və Baş Prokurorun köməkçisi Elnur Eyvazov da iştirak ediblər.
Şamo Əliyev