Abşeron rayonu Məmmədli kənd məscidi əsaslı şəkildə təmir olunur. Rayon icra hakimiyyətinin başçısı İradə Gülməmmədovanın rayonun maddi-mədəniyyət abidələrinin, müqəddəs ocaqlarının bərpası ilə bağlı verdiyi tapşırığa əsasən başlanılan təmir işlərinin artıq böyük bir qismi başa çatmaq üzrədir. 1819-cu ildə inşa edilmiş bu abidə keçmiş Sovet hakimiyyəti dövründə müxtəlif məqsədlər üçün istifadə olunub. Sonuncu dəfə isə məscid 1984-cü ildə təmir olunub.
Abşeron rayon icra hakimiyyətinin başçısı İradə Gülməmmədova Məmmədli kənd məscidində aparılan bərpa və yenidənqurma işlərinin vəziyyəti ilə yaxından tanış olub.
Aparılan təmir-tikinti işlərinin yaxın zamanlarda başa çatdırılacağını vurğulayan Məmmədli kənd bələdiyyəsinin sədri Xəyaləddin Məmmədov Abşeron rayon icra hakimiyyətinin başçısı İradə Gülməmmədovaya görülən işlər barədə ətraflı məlumat verib.
Bildirilib ki, Ümumi ərazisi 700 kv. olan məsciddə, xidməti otaqlar, 240 yerlik mərasim zalı inşa olunub.
Məlumat üçün bildirək ki, Abşeron rayon icra hakimiyyətinin başçısının tapşırığı ilə Məmmədli məscidinin binasının təmir- tikinti işlərinə 2017-ci il iyulun 6-da başlanılmışdı. Xanım başçı məscidin binasının tikintisini daim diqqət mərkəzində saxlayıb, burada həyata keçirilən inşaat işlərinin gedişi ilə maraqlanıb, görülən işlərlə bağlı müvafiq tapşırıqlarını verib.
Şamo Əliyev
