Son dövrlərdə Azərbaycan idmançılarının beynəlxalq yarışlarda idmanın bütün növləri üzrə qələbələri davamlı xarakter almışdır. Əldə olunan nailiyyətlərdə Abşeronlu idmançıların da payı danılmazdır. Bu sahədə görülən işlərin nəticəsidir ki, Abşeron rayonunda sağlam gənc nəsil yetişir. Gənclər zərərli vərdişlərdən və hüquqazidd hərəkətlərdən uzaqdır. Hər il ali məktəblərə qəbul olan gənclərin, eləcə də yüksək bal toplayanların sayı artır, gənclər müxtəlif idman yarışlarında uğurla çıxış edir.
Hər il olduğu kimi , ötən ildə rayonda dövlət gənclər siyasətinin həyata keçirilməsi, idmanın kütləviliyinin təmin edilməsi sahəsində də ciddi iş aparılmışdır.
Bu gün rayonumuzda 6300 nəfərə yaxın yeniyetmə və gənc idmanın 28 növündə məşğul olurlar. 2018-ci il ərzində rayonun gəncləri 10 respublika gənclər tədbirində, 30 beynəlxalq və 48 respublika idman yarışlarında iştirak etmişlər.
İdman yarışlarında gənclərimiz 256 medal qazanmışlar. Ötən il idmançılarımız 11 xarici ölkədə keçirilən beynəlxalq yarışlarda iştirak edərək 45 qızıl, 24 gümüş və 25 bürünc medal əldə etmişlər. Xüsusilə qeyd etmək istərdim ki, 2018-ci ildə fəxrimiz Hacı Əliyev Rusiyada keçirilən sərbəst güləş üzrə Avropa çempionatında qızıl medal qazanaraq 5 qat Avropa çempionu adına layiq görülmüşdür.
Xırdalan şəhər 1 saylı tam orta məktəbin şagirdi 12 yaşlı Ümid Aslanovun Qazaxıstan Respublikasında keçirilən şahmat üzrə beynəlxalq turnirdə qızıl medal qazanması da ötən il idman sahəsində əldə edilən uğurlarımızın bir daha inkişafından xəbər verir. Bu idmançılara rayon İcra Hakimiyyəti tərəfindən böyük qayğı göstərilir və onlarla görüşlər təşkil edilərək qiymətli hədiyyələrə mükafatlandırılmışdır.
Şamo Əliyev