Yeni təqvim ilinin gəlişinə saylı günlər qalıb. Azərbaycanlılar üçün əziz bayram olan 31 dekabr - Dünya Azərbaycanlılarının Həmrəylik Günü və Yeni il respublikamızın hər yerində olduğu kimi Abşeron rayonunda da böyük təntənə ilə qeyd olunub.
Abşeron rayon İcra Hakimiyyəti tərəfindən hazırlanan tədbirlər planına uyğun olaraq rayonun inzibati mərkəzi - Xırdalan şəhəri bayram libasına bürünüb. Park və meydanlar, küçələr, ictimai binaların, evlərin fasadları, eyvanlar bayramsayağı bəzədilib. Heydər Əliyev adına mədəniyyət və istirahət parkının gecə görüntüləri isə xüsusilə cəlbedicidir. Prospekt və küçələrdə quraşdırılan müasir işıqlandırma sistemi, rəngbərəng çilçıraqlar Xırdalanın hüsnünə əlavə rəng qatır.
Hər il olduğu kimi, bu il də 31 dekabr - Dünya Azərbaycanlılarının Həmrəylik Günü və Yeni il münasibəti ilə Abşeron RİH-nin təşkilatçılığı ilə möhtəşəm bayram tədbiri keçirilib.
“Xəzinə Palace”da düzənlənmiş bayram tədbirində Abşeron Rayon İcra Hakimiyyətinin başçısı İradə Gülməmmədova bayram münasibətilə abşeronluları təbrik edərək, regionların sosial-iqtisadi inkişafından, quruculuq və abadlıq işlərinin Abşeron rayonunda da sürətlə aparılmasından danışıb.
İcra Hakimiyyətinin başçısı Həmrəylik Gününün yaranma tarixindən və onun əhəmiyyətindən, bununla bağlı ulu öndər Heydər Əliyevin müstəsna xidmətlərindən bəhs edib. Qeyd olunub ki, Ümummilli Liderin şəxsi təşəbbüsü ilə təsis edilən Dünya Azərbaycanlılarının Həmrəylik Günü müxtəlif ölkələrdə yaşayan həmvətənlərimiz arasında siyasi-iqtisadi, mədəni münasibətlərin, əlaqələringenişlənməsinə imkan yaradıb.
Bildirilib ki, dünya Azərbaycanlılarının milli amal uğrunda mübarizədə vahid yumruq kimi görmək istəyən Ümummilli Liderimiz soydaşlarımıza dünyanın hansı ölkəsində yaşamasından asılı olmayaraq hər zaman tarixi vətənlərinə sədaqətlə xidmət etməyi tövsiyə edib.
Tədbirdə Prezident İlham Əliyevin rəhbərliyi ilə ölkəmizin gündən-günə daha da gücləndiyi vurğulanıb. “Bizim hər birimiz dövlətimizin güclənməsinə çalışmalı və bütün gücümüzlə canab Prezident İlham Əliyevin və Birinci vitse-Prezident Mehriban xanım Əliyevanın ətrafında sıx birləşməliyik” – deyə icra başçısı qeyd edib.
Daha sonra İ.Gülməmmədova rayonun ictimai həyatında səmərəli fəliyyət göstərən bir qrup şəxsə fəxri fərman təqdim edib.
Bayram şənliyində respublikanın tanınmış incəsənət ustalarının ifasında mahnılar səsləndirilib.