İqtisadiyyat və sənaye naziri Şahin Mustafayev Bakıda səfərdə olan Misir Ərəb Respublikasının Qəlubiyyə şəhərinin meri Mohammed Abdel Zahirin rəhbərlik etdiyi nümayəndə heyəti ilə görüşmüşdür.
Görüşdə iqtisadiyyat və sənaye naziri, Azərbaycan Respublikası və Misir Ərəb Respublikası arasında hökumətlərarası iqtisadi, texniki və elmi əməkdaşlıq üzrə Müştərək Komissiyanın həmsədri Şahin Mustafayev ölkələrimiz arasında əlaqələrin uğurla davam etdiyini, əməkdaşlığın inkişafı üçün geniş imkanların olduğunu vurğulamışdır. Qeyd olunmuşdur ki, qarşılıqlı səfərlər, keçirilən görüşlər əməkdaşlığın inkişafında xüsusi əhəmiyyət kəsb edir. Azərbaycan nümayəndə heyəti bu yaxınlarda Misirdə keçirilmiş "Misirin gələcəyi" Beynəlxalq Konfransında iştirak etmişdir. Ölkələrimiz arasında Parlamentlərarası Dostluq Qrupunun və Müştərək Komissiyanın fəaliyyət göstərdiyini qeyd edən Şahin Mustafayev komissiyanın növbəti iclasının bu il Qahirədə keçiriləcəyini bildirmişdir. İş adamları arasında əməkdaşlığın təşviq olunması əlaqələrin inkişafı baxımından əhəmiyyətlidir və Azərbaycan tərəfi Misirdə neft-qaz, turizm, İKT sahələrində həyata keçirilən layihələrdə iştirak edə bilər. Misir nümayəndə heyətinin Azərbaycana səfəri ölkələrimizin regionları arasında əlaqələrin inkişafına öz töhfəsini verəcəkdir.
Misir Ərəb Respublikasının Qəlubiyyə şəhərinin meri Mohammed Abdel Zahir səmimi qəbul üçün təşəkkür etmiş, ölkələrimiz arasında əlaqələrin daha da genişlənəcəyinə əminliyini vurğulamışdır. Misir iqtisadiyyatı barədə məlumat verən qonaq Misirə investisiya qoyuluşu üçün tətbiq edilən güzəştləri diqqətə çatdırmışdır.
Görüşdə iş adamları arasında səmərəli əməkdaşlığın qurulması məqsədilə müvafiq qurumun yaradılması təklifi irəli sürülmüş, Müştərək Komissiyanın bu il nəzərdə tutulan iclasına dair fikir mübadiləsi aparılmışdır.
