Aprelin 8-də Abşeron Rayon İcra Hakimiyyəti, rayon Gənclər və İdman İdarəsi və Azərbaycan Futbol Federasiyaları Assosiasiyasının birgə təşkilatçılığı ilə Abşeron rayon orta ümumtəhsil məktəblərinin 7-ci sinif şagirdləri arasında start götürmüş “Koka-Kola məktəbli kuboku” turnirinin Xırdalan məktəbləri arasında final oyunu keçirilib.
Abşeron rayonu üzrə 2001-2002-ci il təvəllüdlü yeniyetmələr arasında keçirilən turnirin ilk mərhələsi olan Xırdalan şəhər birinciliyində 10 komanda mübarizə aparıb. 7-ci sinif şagirdlərinin mübarizəsi şəraitində keçən qarşılaşmalar "Pley off" sistemində keçirilib
Xırdalan şəhər 2 № li məktəbin yeni süni örtüklü futbol meydanında Xırdalan şəhər 5 № li və Xırdalan şəhər 2 № li məktəblərinin komandalarının görüşü gərgin mübarizə şəraitində keçmişdir. Finalçıların oyununu yüzlərlə azarkeş xüsusi coşqunluqla izləmişdir.Yekun nəticələrə görə birinci yerə Xırdalan 5 № li məktəb, ikinciyə 2 № li , üçüncüyə 3 № li məktəb-liseyin komandası layiq görülüb.
Turnirdə iştirak edən Abşeron rayon Gənclər və İdman İdarəsinin rəisi Əsgər Əmirəliyev futbolun inkişafında xüsusilə məktəbli uşaqlar arasında keçirilən mini-futbol turnirinin böyük rol oynadığını, respublika prezidentinin müvafiq sərəncamı ilə təsdiq olunmuş “Azərbaycan Respublikasında 2005-2015-ci illərdə Futbolun İnkişafına dair Dövlət Proqramı”nın bu tipli tədbirlərin keçirilməsi ilə yüksək səviyyədə icra olunduğunu bildirib
Qalib komandanın-Xırdalan şəhər 5 № li orta məktəbin direktoru Şahin Yusifov qeyd edib ki, “Rayonun məktəbli şagirdləri mini-futbol və digər yarışlar olsun, kütləvi idman tədbirlərinin keçirilməsini razılıqla qarşılayırlar. Yeniyetmələrin idmana cəlb olunması nəinki onların asudə vaxtını daha səmərəli və maraqlı təşkil etməyə imkan verir, eyni zamanda uşaqlar və yeniyetmələr arasında sağlam həyat tərzinin təbliğinə, pis vərdişlərin aradan qaldırılmasına kömək edir.
Qeyd edək ki, turnirdə hər birində 6 nəfər olmaqla 32 komanda ( 4 qrup-hər qrupda 8 komanda) qalib adı uğrunda mübarizə aparacaq. Turnirin yekununda qalib gələn komanda zona birinciliyində Abşeronu təmsil edəcək.