06 may 2015-ci il tarixində Xırdalan şəhər 10№-li tam orta məktəbdə Ümummilli lider Heydər Əliyevin anadan olmasının 92-ci ildönümü münasibətilə şagirdlərin əl işlərindən ibarət sərgi və məktəbin həyətində asfalt üzərində rəsm müsabiqəsi keçirildi. Tədbirdə iştirak edən Abşeron rayon Təhsil Şöbəsinin müdür müavini Pərviz Əhmədov və şöbənin digər əməkdaşları ilk növbədə məktəbin foyesində təşkil olunmuş şagirdlərin əl işlərindən ibarət rəngarəng sərginin eksponatları ilə tanış oldular. Şagirdlərin əl işlərinin yer aldığı bu sərgidə rəsm əsərlərindən, aplikasiya, viraj tipli əl işlərindən, daş üzərində oyma, toxuma, tikmə və digər sənət növlərində hazırlanmış əsərlərdən ibarət əl işləri nümayiş olundu. Ulu öndər Heydər Əliyevin müxtəlif gül və çiçəklərlə bəzədilmiş portretləri, gül şəklində tikmələr və maketlər, göz oxşayan gül kompozisiyaları və ikebanalar xüsusilə diqqəti cəlb edirdi. I Avropa Oyunlarının rəsmi simvolları - Ceyran və Nar da eksponatlar arasında öz layiqli yerlərini tutmuşdular. Daha sonra Abşeron rayon Təhsil Şöbəsinin müdür müavini Pərviz Əhmədov şagirdləri öz adından və Təhsil Şöbəsinin müdiri Nadir Ağayevin adından salamlayaraq müsabiqəni başlamaq üçün start verdi. Müsabiqədə məktəbin müxtəlif siniflərindən hər yaşda şagirdlər iştirak etdi. Müsabiqə iştirakçıları asfalt üzərində tabaşirlə təbiət və vətənpərvərlik mövzusunda, I Avropa Oyunlarının rəsmi simvollarının rəsmlərini çəkdilər. Tədbirə dəvət olunan qonaqların iştirakı ilə ən yaxşı rəsm əsərləri seçildi və 8 nəfər qalib “Fəxri Fərman”larla təltif olundu. Tədbirdə çıxış edən məktəbin direktoru Elnarə Həsənova bildirdi ki, bütün varlığı ilə Vətəni Azərbaycana, xalqına bağlı olan Heydər Əliyev dövlət xadimi kimi uzun illər boyu Azərbaycan xalqına yol göstərəcək, fayda verəcək qiymətli irs yaradıb. Əsası ulu öndər tərəfindən qoyulan siyasət bu gün dövlət başçısı İlham Əliyev tərəfindən layiqincə davam etdirilir. Bildirildi ki, I Avropa Oyunlarının paytaxtımız Bakı şəhərində keçirilməsi haqqında Avropa Olimpiya Komitəsi tərəfindən qəbul edilmiş qərar Azərbaycanın ildən-ilə artan uğurlarının beynəlxalq miqyasda etiraf olunmasının növbəti bariz göstəricisi oldu. Azərbaycan Respublikasının Prezidenti cənab İlham Əliyevin vurğuladığı kimi, biz I Avropa Oyunlarını Yay Olimpiya Oyunları səviyyəsində keçirmək əzmindəyik və bu Oyunlar bir Avropa bayramına çevriləcəkdir. Azərbaycan burada yenə də liderlik keyfiyyətlərini göstərəcəkdir. Çünki Avropa Oyunlarının standartları əslində Bakıda qoyulacaqdır.
Redaktor: Çinarə Sadıxova
