Koreya Respublikasının Azərbaycan Respublikasındakı Səfirliyi və Azərbaycan Taekvondo Federasiyasının birgə təşkilatçılığı ilə 14 sentyabr 2019-cu il tarixində Xırdalan şəhərində yerləşən Abşeron Olimpiya Kompleksində “2019-cu il Taekvondo üzrə gənclər arasında V Səfir Kuboku” keçirilib. Koreya Respublikasının Azərbaycan Respublikasındakı Səfirliyi və Azərbaycan Taekvondo Federasiyasının birgə təşkilatçılığı, Azərbaycan Olimpiya Komitəsinin və Azərbaycan Respublikası Gənclər və İdman Nazirliyinin dəstəyi ilə keçirilən builki tədbirdə 150-yə yaxın Azərbaycanlı gənc qız və oğlan taekvondoçular 10 çəki kateqoriyası üzrə mübarizə aparıb.
Turnirin açılış mərasimində əvvəlcə Azərbaycan Respublikasının dövlət himni səsləndirilib.
2015-ci ildən bəri səfirlik tərəfindən hər il təşkil edilən Səfir Kubokunon əsas məqsədinin Azərbaycanda və bölgələrdə taekvondonun təbliğ edilməsi və Azərbaycan ilə Koreya arasında idman sahəsində əlaqələrin inkişaf etdirilməsi olduğunu vurğulayan Koreya Respublikasının ölkəmizdəki fövqəladə və səlahiyyətli səfiri Tong Op Kim qeyd edib ki, builki qaliblərdən 4 nəfərin noyabr ayında Koreyada keçiriləcək “Səfir Kuboku Dünya Birinciliyi” yarışında iştirak etmək üçün namizədliyi irəli sürüləcək.
Abşeron rayon icra hakimiyyəti başçısının müavini Fuad Cəbrayılov yarış iştirakçılarını və qonaqları salamlayıb, idmançılara uğurlar arzulayıb. F.Cəbrayılov qeyd edib ki, respublikanın bütün bölgələrində olduğu kimi, Abşeron rayonunda dövlət gənclər siyasətinin həyata keçirilməsi, idmanın kütləviliyinin təmin edilməsi sahəsində də ciddi iş aparılması sayəsində son 6 ayı ərzində rayonun gəncləri 21 beynəlxalq və 36 respublika idman yarışlarında iştirak etmiş, gənclərimiz İran, Gürcüstan, Ukraynada keçirilən beynəlxalq idman yarışlarında 98 medal, o cümlədən 40 qızıl medal qazanmışlar.
Turnirin sonunda qalib olan taekvondoçular ATF və Koreya səfirliyinin təsis etdiyi diplom, medal və müxtəlif qiymətli hədiyyələrlı mükafatlandırılıb. İdmançıların mükafatlandırma mərasimində iştirak edən Korey Respublikasının səfiri Tong Op Kim və Abşeron rayon icra hakimiyyəti başçısının müavini Fuad Cəbrayılov taekvondoçularla xatirə şəkli çəkdirib.
Şamo Əliyev
