Rusiyanın “Vestnik Kavkaza” portalı Azərbayanın qədim muğam sənətindən və dünyada yaşayan 54 milyon azərbaycanlının göz yaşları içində dinləydiyi bir musiqi əsərindən - "Qarabağ şikəstəsi"ndən yazıb.
Bakı Musiqi Akademiyasının professoru, sənətşünaslıq doktoru Cəmilə Həsənova bildirib ki, Azərbaycan aşıq musiqisinin ən geniş yayılmış janrlarından olan şikəstə adətən insanların sevdiyi adamdan, sevdiyi vətəndən ayrı düşməsinə həsr edilir.
Professorun sözlərinə görə, çox qədim zamanlardan aşıqlar tərəfindən ifa edilən şikəstəyə XVIII-XIX əsrlərdə muğam ustaları - xanəndələr də müraciət etməyə başladılar və sözləri də dövrün hadisələrinə uyğun şəkildə dəyişdirilib:
"İndiki mətn Qarabağ ətrafında baş verən hadisələrə uyğun dəyişdirilib. Bu bayatının yaranmı tarixi XVIII əsrə gedir. Müəllifi həmin dövrdə yaşamış məşhür şairə, Qarabağ xanının qızı Ağabacı Ağa olub, onu İran hökmdarı Fətəli şaha ərə vermişdilər. Bütün şikəstə növlərinin musiqi əsasında "Segah" muğamı durur".
Yüzillər boyunca Azərbaycanda dinlər və dövlətlər dəyişsə də, bu musiqiyə sevgi azalmayıb. Bir şeyi də xatırlatmağa dəyər ki, 2015-ci ildə Bakıya səfər etmiş Rusiya prezidenti Vladimir Putin "Qarabağ şikəstəsi" eşidən kimi ona heyran qalmışdı.
Nə qədər ki, azərbaycanlılar "Qarabağ şikəstəsi"ni sevəcək, heç kim onların başından Qarabağ sevgisini və itirilmiş yurdlara dönüş istəyini çıxara bilməyəcək. Qarabağ şikəstəsində sak-massagetlərin əfsanəvi qadın hökmdarı, eradan əvvəl 6-cı əsrdə indiki İrəvan şəhərinin ərazisində baş vermiş döyüşdə İran şahı Kirin başını kəsmiş Tomrisin ağısı gizlənib.
Qəhrəman anamız, fars şahı Kir tərəfindən hiylə ilə aldadılaraq öldürülmüş oğluna yas tutub ağı dedikdən sonra qılınca qurşanmışdı və fars qoşununu darmadığın edərək sak-massaget torpaqlarından çıxarmışdı. Fars şahı Kirin başını kəsərək qan dolu tuluqda farsların paytaxtı Anşana göndərmişdi. Azərbaycan xalqı da ulu nənəsinin göstərdiyi şücaəti gec-tez təkrarlayacaq.