Novruz bayramı ərəfəsində Xırdalan şəhər 8 nömrəli məktəbin kollektivi Saray qəsəbəsindəki 2 saylı sağlamlıq imkanları məhdud uşaqlar üçün Sosial Xidmət Müəssisəsində şənlik təşkil etdi. Məktəbin direktoru Xatirə Şabanova bildirdi: “Kimliyimizdən, vəzifəmizdən, tutduğumuz mövqedən asılı olmayaraq çoxumuz valideyinik, ata-anayıq. Övlad sahibi olmaq böyük hissdir. Övladımızın bir xəstəliyi, qüsuru olanda narahat oluruq. 2 saylı sağlamlıq imkanları məhdud uşaqlar üçün sosial xidmət müəssisəsində sağlamlıq imkanları məhdud olan onlarla uşaq var. Onlara dəstək olmaq, hansısa bir probleminin həllinə çalışmaq öz övladlarımıza dəstək olduğumuz qədər mühümdür. Novruz bayramı ərəfəsində onları sevindirmək bizim üçün çox xoş oldu. Onlarla söhbət etdik, fikirləri ilə tanış olduq.
Uşaqlara xonçalardakı şirniyyatlar paylandı. Bəzi uşaqları əlimizlə yedizdirdik. Bayram şənliyi uşaqlara bir dünya sevinc bəxş etdi. Bunu onların simasındakı təbəssümdən aydın sezmək olurdu”.
Tədbirdə uşaqlar, onlara xidmət edənlərlə, məktəbin müəllimləri qol götürüb rəqs edərək, bu balaların sevincinə şərik oldular.
Şamo Əliyev