Bakıda Beynəlxalq Telekommunikasiya İttifaqının (BTİ) dəstəyi və təşkilatçılığı ilə MDB ölkələri üçün kibertəhlükəsizlik üzrə regional təlimlər keçirilir. Ölkəmizdə ilk dəfə təşkil olunan təlimlərin yerli tərəfdaşı Nəqliyyat, Rabitə və Yüksək Texnologiyalar Nazirliyidir.
AZƏRTAC xəbər verir ki, nəqliyyat, rabitə və yüksək texnologiyalar nazirinin müavini Elmir Vəlizadə təlimin işinə uğurlar arzulayıb. Bildirib ki, tədbirin məqsədi sahə üzrə mütəxəssislərin imkanlarını artırmaq üçün məlumat mübadiləsi aparmaq, habelə kibertəhlükəsizliklə bağlı insidentlərə qarşı mübarizə qruplarının fəaliyyətinin idarə olunması, fəaliyyət mexanizmləri ilə əlaqəli məsələləri müzakirə etməkdir.
Sentyabrın 7-dək davam edəcək təlimlərdə Qazaxıstan, Rusiya, Qırğızıstan və Tacikistandan olan mütəxəssislər də iştirak edir. Yüzədək mütəxəssisin iştirak etdiyi təlimlər Avropa və Asiyadan olan, beynəlxalq təşkilatları təmsil edən ekspertlər tərəfindən aparılır.
