Fevralın 13-ü Azərbaycanın böyük oğlu, xalq şairi Bəxtiyar Vahabzadənin anım günüdür.
Bütün türk dünyasının sevimli şairlərindən biri olan B.Vahabzadənin ölümündən 9 il ötsə də, onun əziz xatirəsi unudulmur. Azərbaycan poeziyasının ən parlaq simalarından olan Bəxtiyar Vahabzadə ilə bağlı xatirələr daim ürəklərdədir. O, hər zaman xalqın içində idi. Bu səbəbdən də bütün vətənsevərlər onu sevir, ona güvənirdilər.
Bu məqsədlə, fevralın 14-də Xırdalan şəhər 2 nömrəli tam orta məktəbin kollektivi anım günü münasibətilə ədibin Fəxri Xiyabanda məzarını ziyarət ediblər.
Mərasimdə məktəbin ədəbiyyat müəlliməsi Narınc Əliyeva çıxış edərək Bəxtiyar Vahabzadənin sənətkarlığından, mənsub olduğu millətə bağlılığından, böyük həvəslə yazıb-yaratdığı bənzərsiz əsərlərdən danışıb.
Diqqətə çatdırılılıb ki, Azərbaycan poeziyasında vətəndaşlıq ruhunun qüvvətlənməsində və sənətkarlıq imkanlarının genişlənməsində Bəxtiyar Vahabzadənin müstəsna xidmətləri vardır. Dilimizin poetik imkanlarından məharətlə bəhrələnən şair fəlsəfi məzmunlu lirikanın gözəl nümunələrini yaratmışdır. Onun mənəvi ucalıq, dünya və zaman, təbiət və insan həyatının mənası haqqında düşüncələrlə zəngin poeziyası ədəbi ictimaiyyət tərəfindən daim rəğbətlə qarşılanmışdır. Şairin dərin lirizmi ilə səciyyələnən sözlərinə çoxsaylı mahnılar bəstələnmişdir.
Bəxtiyar Vahabzadənin tariximizin bir çox hadisələrini canlandıran dram əsərlərinin gənc nəslin tərbiyəsində böyük rolu olmuşdur. Müasir həyatdakı ziddiyyətlərin, qarşıdurmaların və mənəvi sarsıntıların təsviri ilə yanaşı, yüksək, pak və ülvi hisslərin tərənnümü Vahabzadə dramaturgiyasında böyük məharətlə təcəssümünü tapmışdır. Onun pyesləri Azərbaycan və eləcə də xarici ölkə teatrlarının səhnələrində uğurla tamaşaya qoyulmuş, müəllifinə geniş şöhrət gətirmişdir.
Bəxtiyar Vahabzadə həm də tədqiqatçı alim kimi Azərbaycan elmi qarşısında xidmətlər göstərmişdir. Şifahi ədəbi irsimizin, klassik və müasir Azərbaycan ədəbiyyatının öyrənilməsi sahəsində axtarışlarının bəhrəsi olan əsərlərini elmi ictimaiyyət daim dərin maraqla qarşılamışdır. Azərbaycan dilinin saflığı, təmizliyi və zənginləşməsi uğrunda mübarizə Bəxtiyar Vahabzadə şəxsiyyətinin mühüm cəhətlərindən biri idi.
Bəxtiyar Vahabzadə respublikamızın hüdudlarından uzaqlarda ölkəmizi layiqincə təmsil edərək, milli mədəniyyətimizin təbliği və ədəbi irsimizin dünyada tanıdılması naminə qüvvə və bacarığını əsirgəməmişdir.
Bəxtiyar Vahabzadənin ədəbi-elmi və ictimai fəaliyyəti yüksək qiymətləndirilmişdir. O, bir sıra orden və medallarla, o cümlədən Azərbaycan Respublikasının ali dövlət təltifi olan “İstiqlal” ordeni ilə təltif olunmuşdur.
Sonda məktəbin 5ə sinifinin şagirdləri tərəfindən şairin şeirlərindən parçalar söylənilib.
Şamo Əliyev