Abşeron Rayon İcra Hakimiyyətinin təşkilatçılığı ilə aprel döyüşlərində şəhid olmuş Rəşid Baxşəliyevin anadan olmasının 23-cü ildönümü münasibəti ilə, şəhidin təhsil adlığı Abşeron rayon Masazır qəsəbə 1 nömrəli tam orta məktəbdə tədbir keçirilib.
Tədbirdə Abşeron RİH-nin əməkdaşları, şəhid ailələri, şəhidin döyüş dostları, yaxın qohumları, ailə üzvləri, Qarabağ Əlil Döyüşçüləri Futbol Federasiyasının nümayəndələri, fəal gənclər və məktəblilər iştirak ediblər.
Toplantıda ilk öncə Azərbaycanımızın azadlığı, istiqlaliyyəti və müstəqilliyi uğrunda canlarını qurban vermiş şəhidlərimizin xatirəsi bir dəqiqəlik sükutla yad edilib.
Yığıncaqda çıxış edənlər qeyd ediblər ki, şəhidimiz Baxşəliyev Rəşid Əliyağa oğlu yaşasaydı bu günü 23 yaşı tamam olacaqdı. Bildirilib ki, Rəşidin əziz xatirəsi hər zaman yad edilir. Çünki Rəşid təkcə ata və anasının deyil, eyni zamanda, bu elin-obanın, bütöv Azərbaycan xalqının oğludur. Şəhidlərimiz elə bir şanlı yol keçiblər ki, başda ölkə rəhbəri olmaqla bütün Azərbaycan xalqı onlarla fəxr edir.
Sonda məktəbin şagirdlərinin ifasında ədəbi-bədii kompozisiya nümayiş olunub.
Daha sonra Abşeron Gənclər Şəhərciyində ehsan süfrəsi verilib. Mərasimdə şəhidin ruhuna dualar oxunub, döyüş yolundan danışılıb.
Şamo Əliyev