45 saylı Abşeron seçki dairəsinin dairə seçki komissiyasında aprelin 11-də ölkədə keçiriləcək prezident seçkilərinə hazırlıq öz axarında davam edir. Bunu sechki-2018.az saytına açıqlamasında dairə seçki komissiyasının sədri Dilşad Abbasova bildirib.
O qeyd edib ki, 45 saylı Abşeron seçki dairəsinin tərkibində 36 seçki məntəqəsi var. Dairə üzrə qeydiyyatda olan seçicilərin sayı 47 min 671 nəfərdir: "Onlardan da 300-ü ilk dəfə səs verəcək. Prezident seçkilərinin demokratik və şəffaf keçirilməsi üçün hər cür şərait yaradılıb. Seçki prosesini müşahidə etmək üçün artıq 12 məntəqədə veb-kamera quraşdırılıb. Əksər məntəqələr seçkiyə hazır vəziyyətə gətirilib. Təkcə uşaq baxçalarındakı məntəqələrdə səsvermə kabinələri seçkiyə bir həftə qalmış quraşdırılacaq".
Əhalinin seçkilərdə fəal iştirakının gözlənildiyini bildirən D. Abbasovan deyib: “Adlarını seçici siyahısında tapmayan bəzi vətəndaşlar bizə müraciət ediblər. Biz də problemi yerində həll etdik və artıq onların adları seçici siyahısına daxil edilib. Həmçinin əhalini seçkilər barədə məlumatlandırmaq üçün Mərkəzi Seçki Komissiyasının maarifləndirici plakatları bütün qəsəbədə müvafiq yerlərə vurulub”.
Qeyd edək ki, Mərkəzi Seçki Komissiyasının təşkilatçılığı ilə dairə seçki komissiyalarının üzvləri və məntəqə seçki komissiyalarının sədrləri üçün keçirilən seçki hüququ üzrə üçgünlük ixtisaslaşdırılmış kurslar Abşeron rayonunda da təşkil olunub.