Xırdalan şəhərində fəaliyyət göstərən 15 saylı bağçada ənənəvi olaraq “Əlvida bağça” adlı tədbir keçirilib. Tədbirdə Abşeron rayon İcra Hakimiyyəti başçısının müavini Fuad Cəbrayılov, Abşeron rayon Təhsil Şöbəsinin müdiri Kamran Rzayev, bağça kollektivi iştirak edib.
Sözügedən bağçanın direktoru Mətanət Novruzova fidanlar barəsində məlumat verərək bildirib ki, bu il ümumilikdə 4 qrup olmaqla cəmi 80 nəfər uşaq bağçanı bitirərərk birinci sinifə gedəcək.
Sonra F.Cəbrayılov fidanlar qarşısında çıxış edərək onlara uğurlar arzulayıb, uşaqlara təmbəl olmamağı, daim çalışmalarını, oxumalarını tövsiyə edib, ataya-anaya və vətənə layiqli övlad olmalarını diləyib. 15 saylı məktəbəqədər təhsil müəssisəsinin hər zaman nümunəvi bağçalardan biri olduğunu vurğulayan F.Cəbrayılov bağça kollektivinə bundan sonrakı faəliyyətlərində də uğurlar arzulayıb.
RTŞ-nin müdiri Kamran Rzayev də təbriklərə qoşularaq fidanların Azərbaycanın gələcəyi olduğunu deyib.
Bundan sonra bayram konserti kiçik fidanların ifasında “Azərbaycan” mahnısının oxunması ilə başlanıb. Uşaqlar öz məharətlərini göstərərək müəllimlərə, əlifbaya, peşələrə aid şeirlər söyləyib, “Rəqəmlərin bəhsi”, “Təmbəl oğlan” səhnəciklərini göstərib, biri-birindən maraqlı rəqslər oynayıblar.