Bakı Ali Neft Məktəbinin (BANM) nümayəndələri Xırdalan şəhər 3 nömrəli tam orta məktəbin şagirdləri ilə görüş keçiriblər. Görüşdə məktəb rəhbərliyi, BANM-in Tələbələrlə iş şöbəsinin əməkdaşları və yuxarı sinif şagirdləri iştirak ediblər.
Tədbiri giriş sözü ilə açan məktəb direktoru Sevinc Məmmədəliyeva təhsil ocağının uğurlarından bəhs edərək, məktəbin 2012-ci ildə "Ən yaxşı ümumi təhsil müəssisəsi" müsabiqəsinin qalibi olduğunu söyləyib. Bildirib ki, hər il məktəbin məzunları yüksək ballarla ölkənin müxtəlif ali təhsil müəssisələrinə qəbul olurlar.
Çıxış edən BANM-in Tələbələrlə iş şöbəsinin rəisi Həbibə Sadıqlı 2016-cı ildə məktəbin məzunu olmuş və qəbul imtahanlarında 651 bal toplayaraq BANM-ə daxil olan Cavidan Muradovun universitetdə qısa zaman müddətində əldə etdiyi nailiyyətlərdən söz açıb. Daha sonra Həbibə Sadıqlı BANM-in fəaliyyət istiqamətləri və perspektivləri barədə məlumat verərək, Ali Məktəbdə tələbələr üçün hərtərəfli şərait yaradıldığını və rəhbərlik səviyyəsində hər zaman tələbələrin bütün təşəbbüs və layihələrinin dəstəkləndiyini qeyd edib.
Sonda şagirdlərin çoxsaylı sualları cavablandırılıb, onlara bukletlər paylanıb.