Bu gün Xırdalan şəhər 5 saylı tam orta məktəbdə Azərbaycan Gənclər Fondunun “Gənclərin ekoloji mədəniyyət təşəbbüsünün artırılmasına dəstək “ mövzusunda tədbir keçirildi.
Tədbirdə Abşeron rayon İcra Hakimiyyətinin məsul əməkdaşı Hafiz Mikayılov, “Yeniləşən Azərbaycan Gəncliyi” İctimai Birliyinin sədri Ehtibar Əsədov, Xırdalan şəhər 5 saylı tam orta məktəblərin müəllim və şagird kollektivi iştirak etdilər.
Tədbiri giriş sözü ilə məktəbin direktoru Şahin Yusifov açaraq, məhz ekoloji mədəniyyətin inkişaf etdirilməsi üçün Azərbaycan Respublikasının Prezidenti İlham Əliyevin təşəbbüsü ilə 2010-cu il ölkəmizdə "Ekologiya ili" elan edildiliyini vurğuladı.Rayonumuzda o cümlədən gənc şəhərimiz olan Xırdalanda Ekologiyanın qorunmasında yaxından iştirak etdiklərini qeyd etdi.
Rayon İcra Hakimiyyətinin Yetkinlik yaşına çatmayanların işləri və hüquqlarının müdafiəsi üzrə komissiyanın məsul katibi Hafiz Mikayılov öz çıxışında ekoloji təhsil və maarifləndirmə zamanı əldə olunan biliklərin, qazanılan təcrübələrin ekoloji mədəniyyətin yaranmasına səbəb olduğunu vurğuladı.
“Yeniləşən Azərbaycan Gəncliyi” İctimai Birliyinin sədri Ehtibar Əsədov çıxış edərək bildirdi ki, Ekoloji mədəniyyətin formalaşmasında əsas vasitələrdən birinin məqsədyönlü ekoloji təhsil almaq olduğunu və ətraf mühitə düzgün münasibət ekoloji bilik nəticəsində formalaşdığını vurğuladılar. Məktəbin şagirdləri mövzu ətrafında onları maraqlandıran suallar verərək cavablar ətrafında qonaqlarla birgə mövzunu müzakirələr etdilər.
