Abşeron rayon Xırdalan şəhər 27 nömrəli körpələr evi-uşaq bağçasının 1 illik yubileyinə həsr olunan tədbir keçirilib.
Tədbirdə Abşeron rayon İcra Hakimiyyəti başçısının müavini Fuad Cəbrayılov, rayon İcra Hakimiyyətinin Yetkinlik yaşına çatmayanların işləri və hüquqlarının müdafiəsi üzrə komissiyanın uşaqlarla iş üzrə məsləhətçi-psixoloqu Seymur Qasımov, Abşeron RİH başçısının Хırdalan şəhər inzibati ərazi dairəsi üzrə nümayəndəsi Rafiq Yusubov , Abşeron RİH-in əməkdaşları Elnarə Umayeva, Samirə İsmayılzadə, rayon ərazisində yerləşən məktəbəqədər təhsil müəssisələrinin rəhbərləri, tərbiyəçilər və digər qonaqlar iştirak ediblər.
Tədbir Azərbaycan Respublikasının Dövlət himninin səsləndirilməsi ilə başlayıb.
Tədbiri giriş sözü ilə açan bağçanın müdiri Samirə Məmmədova vurğulayıb ki, son 12 ildə Abşeron rayonunda onlarla bağçanın, uşaq evlərinin tikilməsi bir çoxunun isə yenidən bərpası Abşeronda uşaqlara göstərilən diqqət və qayğının mühüm tərkib hissəsi olmaqla yanaşı həm də Azərbaycan gələcəyinin daha etibarlı təminatına geniş imkanlar açır. Bu işdə Abşeron rayon İcra Hakimiyyətinin fəaliyyəti isə danılmazdır.
S.Məmmədova həmçinin bağçanım təcrübəli pedaqoji kollektivinin olduğunu, tərbiyəçilərin səylə çalışdığını, körpə fidanların təhsilində, dünyagörüşünün formalaşmasında əvəzsiz xidmətlər göstərdiyini qeyd edib.
Məktəbəqədər təhsil müəssisəsinin 1 illik yubileyi münasibətilə bağça kollektivini və iştirakçıları təbrik edən Fuad Cəbrayılov bildirib ki, dövlətimizin başçısının rəhbərliyi altında ölkəmizdə bütün sahələrdə olduğu kimi təhsilə göstərilən diqqət və qayğı, təhsilin daha da inkişafı, təkmilləşdirilməsi istiqamətində həyata keçirilən ardıcıl və sistemli tədbirlər, icra edilən genişmiqyaslı layihələr, eləcə də təhsilin təməlini təşkil edən məktəbəqədər təhsilin yüksək standartlara uyğun inkişafı, maddi-texniki bazasının gücləndirilməsi istiqamətində mühüm addımların atıldığını qeyd edib və bunun günü-gündən inkişaf edən dövlətimizin gələcəyi olan uşaqların təlim-tərbiyəsinin yüksək səviyyədə təşkili, onların sağlamlığının qorunması və istedadlı kadr potensialının formalaşmasına xidmət edərək daim diqqət mərkəzində olduğunu vurğulayıb. F.Cəbrayılov son illərdə rayon İcra Hakimiyyətinin başçısı İradə Gülməmmədovanın tapşırıq və tövsiyələri əsasında Abşeron rayonunda bir çox uşaq bağçalarında əsaslı təmir və yenidənqurma işlərinin aparıldığını, yeni uşaq bağçalarının tikilməsi ilə bağlı xeyli işlərin görüldüyünü və bununla da məktəbəqədər təhsilin inkişafına nail olmaq istiqamətində bir sıra uğurların əldə edildiyini diqqətə çatdırıb.
Şənliyin sonunda xüsusi hazırlanmış tort kəsilərək musiqi sədaları altında tədbir davam edib.
Sonda kollektivlə birgə xatirə şəkli çəkilib.
Şamo Əliyev
