Fevralın 23-də Xırdalan şəhərində yerləşən 4 nömrəli tam orta məktəbdə “Ana dilimizi sevək!” adlı tədbir keçirilib. Tədbir hər il 21 fevral tarixində qeyd olunan Beynəlxalq Ana dili gününə həsr olunub.
Tədbirdə məktəbin müəllim və şagird kollektivi, valideynlər iştirak edib.
Şagirdlər tədbirdə ədəbi-bədii kompozisiya nümayiş etdirib, ana dili ilə bağlı müxtəlif musiqilər, şeirlər səsləndirib, rəqs nömrələri göstəriblər.
Tədbirin mahiyyəti ana dilinin cəmiyyətimizdə, şagirdlərin yetişməsində rolunu ifadə etməkdən, uşaqların öz dilini sevməsi, ona qayğı göstərməsi, dilimizin gələcək nəsillərə ötürülməsindən ibarətdir. Tədbirdə həmçinin ana dilimizin inkişafında ulu öndər Heydər Əliyevin, o cümlədən ölkə başçısı İlham Əliyevin rolu xüsusilə vurğulanıb.
Məktəbin direktoru Zəminə Nuriyeva çıxışı zamanı qeyd edib ki, hər il məktəbdə bu cür tədbirlər keçirilsə də, bu il daha geniş formada təşkil edilib:
“Dilimizin təbliği istiqamətində müəyyən işlərin görülməsində əsasən məktəblər önəmli rol oynayır. Çünki məktəblər cəmiyyət üçün bir vətəndaş, şəxsiyyət formalaşdırır. Bu baxımdan düşündük ki, bu il tədbiri daha geniş formatda keçirək. Çünki dilimizə yad sözlər daxil olur, dil unudulur, hətta bəzən ana dilinə qarşı soyuqqanlılıq görürük. Tədbirin keçirilmə məqsədi ana dilinin gözəlliyi, rəngarəngliyini uşaqların dili ilə çatdırmaq idi. Uşaqların hamısı istedadlıdır. Amma bu istedadı aşkara çıxarmaq biz təhsil işçilərinin üzərinə düşür”.
Direktor bildirib ki, tədbirdə müəllimlərin uşaqlarla birgə ifası onların birgə səmimiliyindən xəbər verir.
Tədbir məktəbin müəllim və şagird heyətinin birgə ifa etdiyi “Azərbaycan” mahnısı ilə yekunlaşıb.
Aynur Eyvazova
