Xırdalan şəhər 22 saylı körpələr evi-uşaq bağçasında Xocalı faciəsinin 27-ci ildönümü ilə əlaqədar tədbir keçirildi. Anım tədbirində Xocalı soyqırımı qurbanlarının xatirəsi bir dəqiqəlik sükutla yad olundu.
Tədbiri giriş sözü ilə açan bağçanın müdirəsi Fəranə Məhərrəmova ən qəddar və amansız terror hadisələrindən biri olan Xocalı soyqırımı haqqında danışdı. Bildirildi ki, Xocalı soyqırımı 200 ildən artıq müddətdə erməni millətçiləri tərəfindən xalqımıza qarşı aparılan etnik təmizləmə və soyqırımı siyasətinin qanlı səhifəsidir. 1992-ci ilin fevralın 25-dən 26-na keçən gecə Dağlıq Qarabağda erməni quldur birləşmələri keçmiş sovet ordusuna məxsus 366-cı alayın əsgər və zabitləri ilə birlikdə 7 min nəfərədək əhalisi olan Xocalı şəhərini yerlə-yeksan edib, dinc əhalini, xüsusilə uşaqları, qadınları, qocaları, ağlasığmaz vəhşiliklə öldürüblər.
F.Məhərrəmova vurğuladı ki, Azərbaycan hökuməti və parlamenti Xocalı soyqırımı, bütövlükdə erməni millətçilərinin azərbaycanlılara qarşı törətdiyi cinayətlər haqqında həqiqətləri dünya dövlətlərinə, parlamentlərinə və beynəlxalq təşkilatlara çatdırmışlar. Bağçanın müdirəsi həmçinin dedi ki, bu gün eyni siyasət Prezident İlham Əliyev, Heydər Əliyev Fondu, Fondun Rusiya nümayəndəliyi tərəfindən həyata keçirilir.
Anım mərasimində “Xocalı soyqırımı” adlı film nümayiş etdirildikdən sonra bağçanın balaca fidanları faciəyə həsr olunmuş şeirlər söylədilər.
