Vaşinqtonda Mərkəzi Kəşfiyyat İdarəsinin sabiq direktoru Maykl Pompeonun ABŞ-ın dövlət katibi vəzifəsinə namizədliyinin təsdiq edilməsinə dair dinləmələr keçirilib. Xatırladaq ki, martın 13-də ABŞ Prezidenti Donald Tramp dövlət katibi Reks Tillersonu gözlənilmədən vəzifəsindən kənarlaşdırıb.Maykl Pompeo Prezident Donald Trampın məsləkdaşlarından biridir. ABŞ Senatının xarici işlər üzrə komitəsində keçirilən iclas beş saat sürüb. Senatorlar M.Pompeoya ABŞ-ın xarici siyasəti ilə bağlı bəzi məsələlərə münasibəti barədə onlarca sual veriblər. Müzakirələrin əsasını 2016-cı ildə ABŞ-da prezident seçkilərinə Rusiyanın mümkün müdaxiləsi, Vaşinqtonun Rusiyaya qarşı sanksiyaları, habelə İrana və Koreya Xalq Demokratik Respublikasına münasibətdə mövqeləri barədə suallar təşkil edib.
M.Pompeo dinləmələrdə deyib ki, Vaşinqtonun Rusiyaya qarşı sanksiyalarının potensialı hələ tükənməyib. O, həmçinin bildirib ki, Rusiyanın 2016-cı ildə ABŞ-da prezident seçkilərinə müdaxilə etdiyinə əmindir.
Respublikaçılar M.Pompeonun ABŞ dövlət katibi vəzifəsinə təsdiq edilməsi üçün mübarizə aparmalıdırlar. Komitədə respublikaçıların sayı 10 demokrata qarşı 11 nəfərdir. Amma əvvəllər olduğu kimi, indi də bəzi respublikaçılar M.Pompeonun mövqeyi ilə razılaşmayacaqları təqdirdə, onun əleyhinə səs verə bilərlər.