Abşeron rayon Şahmat məktəbində 26 iyun- 03 iyul tarixlərində uşaq və yeniyetmələr arasında 26 İyun “Narkomaniya və narkobiznesə qarşı Beynəlxalq mübarizə günü”nə həsr olunmuş rayon turniri keçirilib.Turnirdə Abşeron Rayon Gənclər və İdman İdarəsinin rəisi Əsgər Əmirəliyev, Abşeron rayon Şahmat məktəbinin müəlliməsi,Respublikanın tanınmış şahmat məşqçisi Rühəngiz Dibirova ,mətbuat nümayəndələri və valdeyinlər iştirak ediblər.
Turnirin keçirilməsində əsas məqsəd Azərbaycanda Şahmatın inkişaf etdirilməsi Dövlət proqramının icrasını təmin etmək, şahmat idman növünü Abşeronda inkişaf etdirmək, uşaqların və yeniyetmələrin asudə vaxtlarının səmərəli istifadəsini təşkil etmək, istedadlı şahmatçıları aşkar edərək onların ustalıq dərəcələrini artırmaq olub. Yarışda 69 idmançı (A və B quruplarında qızlar və oğlanlar ) öz bacarığını sınayıb.
Bu gün açıqlanan yekun nəticələrə görə, A qrupunda oğlanlar arasında M.Rəsul 1-ci, R.Vaqif 2-ci, A.Qoşqar 3-cü yerə, qızlar arasında A qrupunda A.İlahə 1-ci, K.Gülər 2-ci , S.Ayla-3-cü yerə layiq görülüblər.
B qrupunda oğlanlar arasında Mərdli Əli 1-ci, Şirinov Nicat 2-ci, İsgəndərli Əli 3-cü yerə, qızlar arasında B qrupunda Şirinova Qənirə 1-ci,Talıblı İradə 2-ci ,Orucova Ləman -3-cü yerə layiq görülüblər.
A və B quruplarında İlk 3 yerin sahibləri Abşeron Rayon Gənclər və İdman İdarəsi tərəfindən diplom,medal və xatirə hədiyyəsi ilə mükafatlandırılıb.
Qeyd edək ki, keçirilən bu turnir 9 turdan ibarət olub və İsveçrə sistemi üzrə keçirilib,
Abşeron Xəbər-ə müsahibə verən Abşeron Rayon Gənclər və İdman İdarəsinin rəisi Əsgər Əmirəliyev qeyd edib ki, son vaxtlarda Xırdalanda tikilən sosial təyinatlı obyektlərdən biri də şahmat məktəbidir. Bu məktəbdə də yüksək şərait yaradılıb, balacaların şahmatın sirlərinə yiyələnmələri üçün bütün tələblər nəzərə alınıb. Bütün bunlar rayon rəhbəri cənab Zakir Fərəcovun Abşeronda şahmatın inkişaf etdirilməsinə göstərdiyi diqqət və qayğının bariz nümünəsidir . Yaradılan şərait şahmatçılarımızın beynəlxalq yarışlarda möhtəşəm qələbələr qazanmasına, yüksək nəticələr əldə etməsinə imkan verəcək. Şübhəsiz ki, bu məsələdə Xırdalanda inşa olunan şahmat məktəbinin öz yeri olacaq.O həmçinin qeyd edib ki, Abşeron Şahmat məktəbində məşq otaqları və digər əlavə otaqlar var. Otaqlardakı kompyuterlər xüsusi şahmat proqramları ilə yüklənib. Şahmat məktəbi müasir maddi-texniki baza ilə təchiz edilib. Məktəbdə yarış zalı da var. Burada şahmatla peşəkar səviyyədə məşğul olmaq məqsədilə bütün zəruri əyani vəsaitlər mövcuddur.
Ə.Əmirəliyev sonda onuda vurğulayıb ki, Şahmat məktəbinin əsas vəzifəsi idmanın bu intellektual növünün Abşeronda kütləviliyini, şagirdlərin asudə vaxtlarının səmərəli təşkilini təmin etməkdir.
Baş redaktor : Şamo Əliyev
