45 saylı Abşeron seçki dairəsini əhatə edən seçki məntəqələri noyabrın 1-də Milli Məclisə keçiriləcək seçkilərə tam hazır vəziyyətdədir. Onlardan biri də 1179 seçicinin qeydiyyatda olduğu 14 saylı seçki məntəqəsidir. Məntəqənin sədri Ədalət Camalova ABŞERONXƏBƏR-ə bildirib ki, məntəqədə seçicilərin sərbəst, demokratik şəraitdə səs vermələri üçün hər cür şərait yaradılıb. Səsvermə kabinələri qurulub, Mərkəzi Seçki Komissiyası tərəfindən göndərilən əyani vasitələr asılıb. Məntəqə rabitə vasitələri, fasiləsiz elektrik enerjisi və yüksəksürətli internet şəbəkəsi ilə, digər zəruri avadanlıqla təmin edilib. Seçicilərin siyahısı asılıb, bildirişlər hazırlanıb.
Bildirilib ki, məntəqə seçki komissiyası üzvlərinin rahat işləmələri, eləcə də müşahidəçilərin seçki prosesini sərbəst şəkildə izləyə bilmələri üçün də lazımi şərait yaradılıb. Seçki günü səsvermədə iştirak edə bilməyən əlil və xəstə seçicilər səyyar seçki qutuları vasitəsilə səs verəcəklər. Mərkəzi Seçki Komissiyası tərəfindən hazırlanmış seçkilərə çağırış plakatları əhalinin sıx olduğu ərazilərdə asılıb. Namizədlərin təşviqat plakatlarının bərabər səviyyədə yerləşdirilməsi üçün seçki məntəqəsinin yaxınlığına lövhələr qoyulub.
“Məntəqəmizdə seçkiyə hazırlığın vəziyyəti onu deməyə əsas verir ki, seçki günündə heç bir çətinlik yaşanmayacaq, vətəndaşlar öz konstitusion hüquqlarından istifadə edərək istədikləri namizədi şəffaf şəkildə seçəcəklər, - deyə sədr bildirib.
Baş redaktor : Şamo Əliyev
