Abşeron rayonunda yaşıllıqların salınması və yeni ağacların əkilməsi ilə bağlı genişmiqyaslı iməclik keçirilib. Rayon İcra Hakimiyyətinin təşkilatçılığı ilə baş tutan aksiyada icra hakimiyyəti aparatının əməkdaşları, inzibati ərazi dairəsi üzrə nümayəndəlikləri, Mənzil-Kommunal Təsərrüfatı Birliyinin işçiləri, bələdiyyə üzvləri və sakinlər iştirak ediblər.
Xırdalan şəhəri də daxil olmaqla, ümumilikdə rayonun 15 kənd və qəsəbəsində 3100 ədəd ağac əkilib. Belə ki, Xırdalan şəhəri üzrə 500, Masazır, Saray, Mehdiabad qəsəbələrinin hər birində 300, Qobu, Ceyranbatan, Aşağı Güzdək, Novxanı və Məmmədli kəndlərində müvafiq olaraq 200, Hökməli, Güzdək, Digah, Görədil və Prəkəşkül –Qobustan kəndlərində isə 100 ağac torpağa basdırılaraq suvarılıb.
İlin əvvəlindən başlayaraq qəsəbə və kəndlərin daxilində, eləcə də magistral yolların kənarlarında təmizləmə işləri aparılıb, yeni torpaq qatı salınıb və geniş abadlıq işləri görülüb.
Yüzlərlə insanın iştirak etdiyi aksiya zamanı yalnız yerli mühitə və iqlimə uyğun olan ağaclar əkilib. Mövsüm ərzində Abşeron rayonunda ərazinin yaşıllaşdırılması, yaşıllıqlara qulluq və abadlıqla bağlı işlərin davam etdirilməsi nəzərdə tutulub.
Getdikcə vüsət alan ağacəkmə aksiyaları nəticəsində rayonun ərazisi abadlaşır, yaşıllıqlarla zənginləşir, ekoloji mühit sağlamlaşır və insanlar arasında təbiətə qayğı hissi təbliğ edilir.
