Abşeron rayonunun Mehdiabad qəsəbəsində fəaliyyət göstərən 4 saylı məktəbdə Azərbaycanın Xalq yazıçısı Anar Rzayevlə şagirdlərin görüşü keçirilib. Abşeron rayon İcra Hakimiyyətinin və rayon təhsil şöbəsinin birgə təşkil etdiyi görüşdə Abşeron RİHB-nin müavini Fuad Cəbrayılov, rayon Təhsil şöbəsinin müdiri Kamran Rzayev, “525-ci qəzet”in baş redaktoru, şair Rəşad Məcid, məktəbin müəllim və şagird kollektivi iştirak ediblər.
Böyük yazıçını məktəbin girişində üzlərindən sevinc oxunan uşaqlar qarşılayıb. Yeniyetmələrin alqış səsi, məktəbin öncüllərinin “xoş gəldiniz, Anar müəllim” sədalarıyla yazıçını qarşılamaları fərəhli bir mənzərə yaradıb. Şagirdlərin saz sədaları altında Dədə Qorqudun təbirincə Anara oxuduqları xeyir-dualar daha çox yaddaqalan olub.
Məktəbin direktoru Elnura Cavadzadənin açılış nitqilə başlayan tədbir sona qədər Azərbaycanın Xalq yazıçısı Anarla məktəblilərin aktiv ünsiyyəti ilə keçib. Çoxlu suallar hazırlamış şagirdlər öz bilik və bacarıqları ilə yazıçını heyran ediblər. Bundan əlavə, Anar haqqında başqa-başqa ədiblərin fikirləri səsləndirilib, şeirlər oxunub.
Görüş zamanı yazıçının həyat və yaradıcılığı ilə bağlı videoçarx təqdim olunub, Anarın şeirləri sazın müşayiəti ilə səsləndirilib, onun ssenraisi əsasında çəkilmiş film və tamaşalardan səhnəciklər göstrəlib.
Sonra çıxış edən Abşeron rayon İcra Hakimiyyəti başçısının müavini Fuad Cəbrayılov bildirib ki, ədəbiyyatımızın görkəmli nümayəndəsinin, İstiqlal ordenli, Yazıçı Anar Rzayevin Abşeron məktəblərindən birinə gəlməsi bizim üçün çox sevindirici haldır. Onun həyat və fəaliyyəti gənclərin, yeniyetmələrin tərbiyələnməsində, fərd kimi formalaşmasında xüsusi əhəmiyyət daşıdığını vurğulayan F.Cəbrayılov qeyd edib ki, böyük ziyalı olan yazıçı Anarla ünsiyyətdə olmaq, onun fikirlərini dinləmək hər bir insan üçün faydalı, xeyirli və arzulanandır. “Mən inanıram ki, onun bu gün şagirdlərlə görüşə gəlməsi uzun müddət yaddaşlardan silinməyəcək və bu yeniyetmələrin formalaşmasına, inkişafına, gələcək addımlarının müəyyənləşməsinə təsirsiz ötüşməyəcəkdir”.
Tədbirin sonunda Azərbaycanın Xalq yazıçısı Anar iştirakçılara imzalı kitablarını təqdim edib.