Təhsil Nazirliyinin əmrinə əsasən, 2015-2016-cü tədris ilinin yekunu ilə əlaqədar bu gün respublikanın ümumtəhsil məktəblərində “Son zəng” günü qeyd edilir. Bir çox rayonlarda olduğu kimi, Abşeron rayonunda da “Son zəng" tədbirləri təmtəraqlı təşkil edilib.
İyunun 14-də Masazır qəsəbəsindəki 3 saylı tam orta məktəbdə keçirilən “Son zəng” tədbirində Abşeron Rayon İcra Hakimiyyəti başçısının müavini Fuad Cəbrayılov, rayon Təhsil Şöbəsinin müdiri Kamran Rzayev, məktəbin müəllim və şagird kollektivi və valideynlər iştirak ediblər.
Azərbaycan Dövlət Himninin oxunması ilə başlayan tədbirdə on birinciləri təbrik edən məktəbin direktoru Kəmalə Məmmədova məzunlara Azərbaycanın layiqli vətəndaşı olmağı, müəllimlərinin və valideynlərin etimadını doğrultmağı arzulayıb. O, bildirib ki, cari tədris ilində iki sinifdə 42 şagird məktəbi bitirir.
Tədbirdə çıxış edən Fuad Cəbrayılov müstəqil həyata qədəm qoyan məzunları bayram münasibəti ilə təbrik edib. Həyatın çətin sınaqlarının bundan sonra başladığını vurğulayan F.Cəbrayılov hər il olduğu kimi, bu il də 3 saylı tam orta məktəbi bitirən məzunların əksəriyyətinin tələbə adına layiq görüləcəyinə, xalqımızın gələcəyi naminə görülən böyük işlərin iştirakçılarına çevriləcəyinə inamını ifadə edib.
Sonra Kamran Rzayev hər bir valideynin övladının yaxşı təhsil almasını istədiyini, məzunların elm yolunda irəliləməsinin vacibliyini söyləyib.
Bundan sonra “Son zəng” tədbirində məktəbin 1-ci və 11-ci sinif şagirdlərinin hazırladıqları şeir, mahnı və rəqslərdən ibarət çıxışları nümayiş olunub. Məktəb həyatına əlvida deyən məzunlar doğma məktəbə və onlara dərs deyən müəllimlərə minnətdarlıqlarını çatdırıblar.
Şamo Əliyev
