Abşeron rayon Şahmat məktəbində uşaq və yeniyetmələr arasında “26 iyun Silahlı Qüvvələr Günü”nə həsr olunan rayon turniri keçirilib.Turnirdə Abşeron Rayon Gənclər və İdman İdarəsinin rəisi Əsgər Əmirəliyev, Abşeron rayon Şahmat məktəbinin müəlliməsi, respublikanın tanınmış şahmat məşqçisi Rühəngiz Dibirova, mətbuat nümayəndələri və valideynlər iştirak ediblər. Yarışın keçirilməsində əsas məqsəd Abşeronda şahmatın inkişaf etdirilməsinə tövhə vermək, uşaqların və yeniyetmələrin asudə vaxtlarının səmərəli istifadəsini təşkil etmək, istedadlı şahmatçıları aşkar edərək onların ustalıq dərəcələrini artırmaq olub. Yarışda 49 idmançı (A və B qurupları üzrə qızlar və oğlanlar) öz bacarığını sınayıb. A və B quruplarında ilk 3 yerin sahibləri Abşeron Rayon Gənclər və İdman İdarəsi tərəfindən diplom, medal və xatirə hədiyyələri ilə mükafatlandırılıb. Qeyd edək ki, keçirilən bu turnir 9 turdan ibarət olub və İsveçrə sistemi üzrə keçirilib.
Qaliblərin mükafatlandırılması mərasimində çıxış edən Ə.Əmirəliyev qeyd edib ki, son vaxtlarda Xırdalanda tikilən sosial təyinatlı obyektlərdən biri də şahmat məktəbidir. Bu məktəbdə də yüksək şəraitin yaradıldığını, balacaların şahmatın sirlərinə yiyələnmələri üçün bütün tələblərin nəzərə alındığını vurğulayan Ə.Əmirəliyevin sözlərinə görə, bütün bunlar rayon şahmatçılarının beynəlxalq yarışlarda möhtəşəm qələbələr qazanmasına, yüksək nəticələr əldə etməsinə imkan verəcək.O, həmçinin, qeyd edib ki, Abşeron Şahmat Məktəbində məşq otaqları və digər əlavə otaqlar var. Şahmat məktəbi müasir maddi-texniki baza ilə təchiz edilib.