Abşeron Rayon İcra hakimiyyətinin başçısı İradə Gülməmmədovanın rayonun Məmmədli kəndində sakinlərlə növbəti səyyar qəbul-görüşü keçirilib. Görüşdə rayonun hüquq-mühafizə orqanlarının, səhiyyə, təhsil, mədəniyyət və digər xidmət təşkilatlarının rəhbərləri və kənd sakinləri iştirak edib.
Rayonun kənd və qəsəbələrində yaşayan əhali ilə mütəmədi olaraq görüşlərin keçirildiyini, bunun artıq ənənə xarakter daşıdığını vurğulayan İ.Gülməmmədov səyyar qəbulların məqsədinin yerlərdə ortaya çıxan problemlərin öyrənilməsi və həlli istiqamətində addımların atılması olduğunu qeyd edib. Məmmədli kənd sakinləri ilə keçən il oktyabrın 23-də görüş keçirildiyini vurğulayan başçı ötən müddət ərzində bir çox işlərin görüldüyünü, sakinlər tərəfindən qaldırılan problemlərin həlli istiqamətində mühüm addımlar atıldığını qeyd edib.
Sonra Abşeron Rayon İcra Hakimiyyəti başçısının müavini İlham Quliyev hesabat xarakterli çıxış edib. O bildirib ki, keçən ilki görüş zamanı edilmiş müraciətlərlə əlaqədar olaraq kənd ərazisində inşa olunan 37 çoxmənzilli yaşayış binasında yaşayan 2200 nəfərdən çox sakinin, eyni zamanda şorgölü ətrafı və Badamlıq adlanan ərazidə fərdi yaşayış evlərində məskunlaşmış 200-ə yaxın ailənin içməli su ilə bağlı problemləri ciddi nəzarətə götürülüb və problem qısa bir zamanda tamamilə aradan qaldırılıb. Belə ki, 1400 diametrlik Qala-Pirallahı xəttindən birləşmə verilməklə 37 çoxmənzilli yaşayış binasında yaşayan sakinlər üçün 800 paqometr uzunluğunda 110 mm diametrli yeni içməli su xətti, şorgölü ətrafında yaşayan aiələlər üçün isə 390 paqometr uzunluğunda 160 və 110 mm diametrli borularla yeni içməli su xətti çəkilərək əhalininn istifadəsinə verilib. Qeyd edilib ki, səyyar qəbul zamanı MTK tərəfindən inşa olunmuş 37 yaşayış binasının qazlaşdırılması ilə bağlı qaldırılmış problemlə əlaqədar olaraq 33 çoxmənzilli yaşayış binasının qazlaşdırılması təmin edilib, qalan 4 binanın qazlaşdırılması ilə bağlı işlər davam etdirilir. Bununla yanaşı, sözügedən 37 yaşayış binasında telefonlaşma işləri tam şəkildə başa çatdırılıb.
Vurğulanıb ki, Məmmədli kəndinin elektrik enerjisi ilə təminatının yaxşılaşdırılması ilə əlaqədar olaraq ötən müddət ərzində 6 ədəd yeni güc mərkəzi yaradılıb, 1 ədəd 630 KVA-lıq, 3 ədəd 400 KVA-lıq, 2 ədəd 250 KVA-lıq transformator quraşdırılıb. Yeni yaradılmış güc mərkəzlərində 18 km uzunluğunda yeni 0.4 KV-luq SİP ilə şəbəkə qurulub, 1125 ədəd dayaq basdırılıb, 10 KV-luq Məmmədli-1 və 2-ci hava veriliş xətlərində 6500 metr AS-50 naqil dəyişdirilib. Eyni zamanda Məmmədli kəndinə əlavə olaraq 2 ədəd transformatorun qoyulmasına ehtiyac duyulduğu üçün bu istiqamətdə addımlar atılıb, müvafiq yerlər müəyyən edilərək hazırlıq işləri görülüb və yaxın vaxtlarda transformatorların qoyulması nəzərdə tutulub. Bununla yanaşı olaraq kənd ərazisində 1 ədəd dayanacaq quraşdırılıb,
Bundan sonra kənd sakinlərindən Bəşir Mansurov, Şərif Şərifov, Hüseyn Hüseynov, Aida Babayeva, Könül Mustafayeva, Cəsarət Rüstəmov, Əlimurad Rzayev və digərləri çıxış edərək rayon icra başçısının kənd və qəsəbələrdə səyyar görüşlərinin keçirməsinin çox böyük əhəmiyyət daşıdığını, əhali tərəfindən irəli sürülən təkliflərinin reallaşmasında və problemlərin həll olunmasında müstəsna kömək etdiyini bildiriblər. Qeyd ediblər ki, ötən görüş zamanı qaldırılan içməli su problem tamamilə həll olunub. Hazırda hər evə içməli suyun gəldiyini qeyd edən sakinlər kəndin elektrik enerji təminatında da müsbət dəyişikliklərin olduğunu qeyd ediblər. Çıxışçılar rayonunda, eləcə də Məmmədli kəndində aparılan quruculuq və abadlıq işlərinə görə təşəkkür edərək, kəndin yeni salınan məhəllələrinə telefon xəttlərinin çəkilməsində, küçələrin abadlaşdırılmasında, elektrik enerjisinin gücünün artırılmasında köməklik göstərilməsini xahiş ediblər.
Sakinlər tərəfindən qaldırılan məsələlərin mümkünləri yerindəcə həll olunub, müəyyən vaxt və vəsait tələb edən digər məsələlərin həlli istiqamətində isə müvafiq tapşırıqlar verilib.
Görüşün yekununda İ.Gülməmmədova bildirib ki, sakinlərlə səyyar görüşlərin keçirilməsi bundan sonra da davam etdiriləcək. O, qeyd edib ki, Abşeron əhalisi surətlə artır və buna müvafiq olaraq müəyyən təlabatlar ortaya çıxır. Rayon İcra Hakimiyyəti tərəfindən də həm meydana gələn təlabatları qarşılamaq, həm də yaranan problemlərin vaxtında həlli üçün lazım olan bütün addımlar atılır. 
