Bakı İdman Sarayında böyüklər arasında cüdo üzrə Azərbaycan çempionatı keçirilib.İlin son cüdo yarışının görüşləri də maraqlı və gərgin idman mübarizələrlə yadda qalıb.
Kişilər və qadınlar arasında ölkə çempionatının təntənəli açılış mərasimi hakimlər və iştirakçı komandaların paradı ilə start götürüb.Azərbaycan Cüdo Federasiyasının təşkilatçılğı ilə keçirilən yarışda ölkəmizin ən güclü kişi və qadın cüdoçuları mübarizə aparıblar. Ölkə çempionatında 48 klubdan 366 cüdoçu qüvvəsini sınayıb.
Yarışmanın 1-ci günü Abşeron təmsilçisi Günel Həsənova üçün uğurlu alınıb. Belə ki,Abşeron yığma komandasının liderlərindən hesab olunan Günel Həsənova Azərbaycan çempionatının qızıl medalını qazanıb. Məlumat üçün bildirək ki, Abşeron klubunun idmançılarının baş məşqçisi Hətəm Əhmədov olub. Azərbaycan çempionatının görüşlərini beynəlxalq və respubkika dərəcəli hakimlər idarə ediblər. İlk dəfə olaraq ölkə çempionatında Gürcüstan, Belarus və Tacikistandan 3 beynəlxalq dərəcəli hakim ədalət təmsilçisi olub. Görüşlər tam analiz olunub və yerli hakimlərlərlə fikir mübadiləsi aparılıb, seminarlar keçirilib.
Qaliblərin mükafatlandırma mərasimində gənclər və idman naziri Azad Rəhimov, Dövlət Təhlükəsizlik Xidmətinin rəisi, general-leytenant Mədət Quliyev, Milli Olimpiya Komitəsinin vitse-prezidenti Xəzər İsayev, Azərbaycan Cüdo Federasiyasının vitse-prezidenti Sadıq Sadıqov, Olimpiya çempionları, veteran cüdoçular və tanınmış idman xadimləri iştirak ediblər.
Qaliblərə medallar, fəxri diplomlar və pul mükafatları təqdim olunub.
Şamo Əliyev