Abşeron rayon İcra Hakimiyyətinin başçısı İradə Gülməmmədova ötən ilin aprel ayında cəbhədə yaşanmış gərginlik zamanı ehtiyatda olan zabitlərin və Qarabağ müharibəsi əlillərinin, veteranların ön cəbhəyə edilən səfərində, əsgərlər arasında hərbi-psixoloji söhbətlərin aparılmasında, onların döyüş əzminin daha da yüksəldilməsində göstərdiyi diqqət və qayğıya görə Fəxri Fərmanla təltif edilib. Bununla əlaqədar olaraq Müharibə Veteranları və Beynəlmiləlçi Hərbçilər İctimai Birliyinin sədri, Müdafiə Nazirliyinin Hərb Tarixi Muzeyinin rəisi Əzizağa Qəni-zadə, Qarabağ Müharibəsi Əlilləri, Veteranları və Şəhid Anaları İçtimai Birliyinin Abşeron rayon şöbəsinin sədri Raya Alışanova, Şəhid, Əlil və Veteranlar Birliyinin Abşeron Rayon Şöbəsinin sədri Rasim Ələkbərovla görüş keçirilib. Görüşdə İ.Gülməmmədova Azərbaycan ordusunun günü-gündən gücləndiyini qeyd edərək hərçilərimizin ötən ilin aprel ayında cəbhədə əldə etdikləri uğurların Azərbaycan əsgərinə olan inamı daha da gücləndirdiyini vurğulayıb. Xüsusi əhəmiyyət kəsb edən yüksəkliklərin geri qaytarılmasının əhəmiyyətini qeyd edən icra başçısı bu hadisələr zamanı düşmənə vurulan ağır zərbədən və onların mövqelərini tərk etməsindən söhbət açıb.
Aprel döyüşləri zamanı hər bir Azərbaycanlının ürəyinin cəbhə ilə döyündüyünü, gənclərimizin könüllü olaraq cəbhəyə yollandığını qeyd edən İ.Gülməmmədova deyib ki, ordumuzun hər an torpaqlarımızı işğaldan azad etməyə qadir olduğu bir daha sübut olunub.
Sonra Ə.Qəni-zadə, R.Alışanova və R.Ələkbərov bildiriblər ki, aprel hadisələri zamanı Qarabağ müharibəsi əlillərinin, veteranlarının və ehtiyatda olan zabitlərin cəbhə bölgəsinə səfərlər etməsi, əsgərlərlə söhbətləşməsi çox böyük nəticələr verib. Bu səfərlərin əsgərlərin ruh yüksəkliyini daha da artırdığı qeyd olunaraq vurğulanıb ki, hərbçilərimizin əldə etdiyi qələbələr cəmiyyətimizdə də müsbət əks-səda yaradıb.
Daha sonra İ.Gülməmmədovaya Fərxri Fərman təqdim edilib və xatirə şəkili çəkilib.
