Abşeron rayon Gənclər və İdman İdarəsinin təşkilatçılığı və Abşeron rayon İcra Hakimiyyətinin dəstəyi ilə Xırdalan şəhər 10 № -li tam orta məktəbin idman zalında aprel şəhidi Rəşid Baxşəliyevin xatirəsinə həsr olunmuş yeniyetmə və gənclər arasında Taekvondo idman növü üzrə I açıq turnir keçirilib.
Yarışda torpaqlarımızın müdafiəsi uğrunda canlarından keçən şəhidlərin ruhu bir dəqiqəlik sükutla yad edilib.
Turnirin əsas məqsədi milli dövlətçilik ideyalarını aşılamaq, vətənpərvərlik ruhunu qaldırmaq, şəhidlərin xatirəsini yad etməkdən ibarət idi.
Tədbirdə qəhrəman Vətən oğulunun keçdiyi şərəfli həyat yolu, torpağa, milli-mənəvi dəyərlərə bağlılığı, döyüş yolu, müqəddəs şəhidlik zirvəsinə ucalması haqqında çıxışlar edilib.
Abşeron rayon Gənclər və İdman İdarəsinin rəisi Əsgər Əmirəliyev çıxış edərək keçirilən turnirin məqsəd və əhəmiyyətindən danışıb.Bildirib ki, turnir aprel döyüşlərində şəhid olmuş Rəşid Baxşəliyevin xatirəsinə həsr olunub. Turnirin keçirilməsində əsas məqsəd rayon gənclərinin asudə vaxtlarının düzgün və səmərəli təşkili, aprel döyüşlərində həlak olmuş şəhidlərimizin əziz xatirəsini yad etmək, onların ailələrinə mənəvi dəstək olmaq, gənclərə vətənpərvərlik hisslərinin aşılanması və sağlam həyat tərzinin təbliğ olunmasından ibarətdir.
Ə.Əmirəliyev aprel döyüşlərində ordumuzun qazandığı tarixi qələbədən danışaraq qeyd edib ki, bu qələbə ermənilərə ordumuzun gücünü göstərdi. Bəzi strateji yüksəkliklər, o cümlədən Lələtəpə düşməndən azad olundu. Aprel döyüşləri Azərbaycan Silahlı Qüvvələrinin hərbi qüdrətini nəinki Ermənistana, bütün dünyaya bir daha nümayiş etdirdi. Dünya Azərbaycan Ordusunun bu döyüşlərdə yüksək peşəkarlıq, qəhrəmanlıq göstərdiyinin şahidi oldu. Bunun nəticəsində Cəbrayıl rayonunun Cocuq Mərcanlı kəndində yaşayış üçün yaranan təhlükə aradan qalxdı. Prezident İlham Əliyevin göstərişi ilə kənddə tikinti-quruculuq işlərinə başlanıldı. Bu, məcburi köçkünlərin öz doğma torpaqlarına böyük qayıdışının başlanğıcıdır.
Daha sonra şəhidin valideyni –Əliağa Baxşəliyev çıxış edərək övladının xatirəsini əziz tutduqlarına, yaddan çıxarmadıqlarına görə Abşeron rayon İcra Hakimiyyətinin başçısı İradə xanım Gülməmmədovaya , rayon Gənclər və İdman İdarəsinin rəisi Əsgər Əmirəliyevə və əməyi keçən hər kəsə ailələri adından öz dərin minnətdarlıqlarını çatdırıb.
Anım mərasimində çıxış edən Abşeron RİH-in əməkdaşı Mirqasım Mirişli şəhidin ailəsinə və doğmalarına dərin hüznlə başsağlığı verib, torpaqlarımızın müdafiəsi uğrunda şəhid olan Rəşid Baxşəliyevin xatirəsinin Abşeronluların qəlbində əbədi yaşayacağını bildirib.
Məlumat üçün bildirək ki, gərgin idman mübarizəsi şəraitində keçən turnirdə ümumilikdə Bakı,Sumqayıt şəhərlərindən və Abşeron rayonundan 9 komandanın 110 idmançısı iştirak edib.
Sonda müxtəlif nominasiyalar üzrə turnirdə iştirak edən idmançılara Abşeron rayon Gənclər və İdman İdarəsinin Diplom və medalları təqdim olunub.
Tədbirin yaddaqalan məqamlarından biri də o olub ki, şəhidin ailəsinə Ə.Əmirəliyev tərəfindən xatirə hədiyyəsi təqdim edilib.
Şamo Əliyev
