Abşeron rayon Gənclər və İdman İdarəsinin təşkilatçılığı və Abşeron rayon İcra Hakimiyyətinin dəstəyi ilə mayın 5-də Abşeron rayonu Qobu qəsəbəsində yerləşən Cavanşir İdman Klubunda Aprel şəhidi Əli Heydərovun xatirəsinə həsr olunmuş Yunan-Roma güləşi üzrə yeniyetmələr arasında şəhərlərarası turnir keçirilib.
Abşeron rayon Gənclər və İdman İdarəsinin rəisi Əsgər Əmirəliyev çıxış edərək keçirilən turnirin məqsəd və əhəmiyyətindən danışıb.Bildirib ki, turnir aprel döyüşlərində şəhid olmuş Əli Heydərovun xatirəsinə həsr olunub. Turnirin keçirilməsində əsas məqsəd rayon gənclərinin asudə vaxtlarının düzgün və səmərəli təşkili, aprel döyüşlərində həlak olmuş şəhidlərimizin əziz xatirəsini yad etmək, onların ailələrinə mənəvi dəstək olmaq, gənclərə vətənpərvərlik hisslərinin aşılanması və sağlam həyat tərzinin təbliğ olunmasından ibarətdir.
Ə.Əmirəliyev aprel döyüşlərində ordumuzun qazandığı tarixi qələbədən danışaraq qeyd edib ki, bu qələbə ermənilərə ordumuzun gücünü göstərdi. Bəzi strateji yüksəkliklər, o cümlədən Lələtəpə düşməndən azad olundu. Aprel döyüşləri Azərbaycan Silahlı Qüvvələrinin hərbi qüdrətini nəinki Ermənistana, bütün dünyaya bir daha nümayiş etdirdi. Dünya Azərbaycan Ordusunun bu döyüşlərdə yüksək peşəkarlıq, qəhrəmanlıq göstərdiyinin şahidi oldu. Bunun nəticəsində Cəbrayıl rayonunun Cocuq Mərcanlı kəndində yaşayış üçün yaranan təhlükə aradan qalxdı. Prezident İlham Əliyevin göstərişi ilə kənddə tikinti-quruculuq işlərinə başlanıldı. Bu, məcburi köçkünlərin öz doğma torpaqlarına böyük qayıdışının başlanğıcıdır.
Daha sonra şəhidin atası –İntiqam Heydərov çıxış edərək övladının xatirəsini əziz tutduqlarına, yaddan çıxarmadıqlarına görə Abşeron rayon İcra Hakimiyyətinin başçısı İradə xanım Gülməmmədovaya , rayon Gənclər və İdman İdarəsinin rəisi Əsgər Əmirəliyevə və əməyi keçən hər kəsə ailələri adından öz dərin minnətdarlıqlarını çatdırıb.
Anım mərasimində çıxış edən Gənclər və İdman Naziliyinin əməkdaşı Tofiq Eyvazov, Cavanşir İdman Klubunun rəhbəri Cavnşir Qurbanov, qəsəbə ağsaqqalı Nadir Əliyev şəhidin ailəsinə və doğmalarına dərin hüznlə başsağlığı verib, torpaqlarımızın müdafiəsi uğrunda şəhid olan Əli Heydərovun xatirəsinin Abşeronluların qəlbində əbədi yaşayacağını bildiriblər.
Məlumat üçün bildirək ki, gərgin idman mübarizəsi şəraitində keçən turnirdə ümumilikdə Bakı,Sumqayıt Lənkəran, Kürdəmir şəhərlərindən və Abşeron rayonundan 9 komandanın 105 idmançısı iştirak edib.
Sonda turnirdə iştirak edən idmançılara Abşeron rayon Gənclər və İdman İdarəsinin Diplom və medalları təqdim olunub.
Şamo Əliyev
