Xırdalan şəhər 2 nömrəli tam orta məktəbdə "ingilis dili fənn aylığı"na həsr olunmuş ingilis dilində açıq dərs keçirilib.
Tədbirdə məktəbin müəllim və şagird kollektivi ,Abşeron RTŞ-nın nümayəndələri və digər qonaqlar iştirak ediblər.Tədbirin keçirilməsində məqsəd şagirdlərin ingilis dilində bacarıqlarını nümayiş etdirmək, onlarda xarici dillərə qarşı maraq yaratmaqdır.
Məktəbin 10-cu sinif şagirdlərinin təqdimatında baş tutan tədbir aparıcıların açılış nitqi və dövlət himninin səsləndirilməsi ilə başlayıb.Giriş sözü ilə çıxış edən məktəb direktor müavini Rasim Hüseyinov qonaqlara tədbirin mahiyyəti barədə məlumat verərək, bildirib ki, may ayı məktəbin fəaliyyət planına “İngilis dili fənn aylığı” kimi daxil olub. Bu məqsədlə siniflərdə ingilis dili müəllimlərinin açıq dərsləri keçirilir.
Təhsil şöbəsinin ingilis dili fənni üzrə metodisti Yaydagül Rəhimova məktəb rəhbərliyinin xarici dillərin tədrisinə göstərdiyi diqqətin təqdirəlayiq olduğunu söyləyərək, tədbir təşkilatçılarına təşəkkürünü bildirib.
Sonra bir-birindən maraqlı çıxışlar başlayıb. Şagirdlər "İki küpə girən qarı" filmindən qısa bir səhnə və “Hind”, “İspan”, “Avar” rəqsləri nümayiş etdiriblər.
Təqdim edilən proqram iştirakçılar tərəfindən böyük maraqla qarşılanıb.
Sonda məktəbin direktor müavini R.Hüseyinov maraqlı və məzmunlu tədbirə görə təşkilatçı Gülnarə Haçızadəyə , metodbirləşmə rəhbəri Gülnar Hüseyinovaya və iştirakçılara minnətdarlıq edib.
Tədbir şagirdlərin ingilis dilində oxuduqları mahnı ilə yekunlaşıb.
Şamo Əliyev
