Türk Əməkdaşlıq və Koordinasiya Agentliyi (TİKA) Abşeron rayonu Güzdək qəsəbəsində yerləşən “Tələbə Evində”, tələbələr və Güzdək qəsəbəsində yaşayan gənclərin istifadəsi üçün mini stadion inşa edib.
Toplantıda Türkiyə Respublikasının Azərbaycanda təyin olunmuş fövqəladə və səlahiyyətli səfiri Erkan Özoral, Abşeron RİH-in tikinti və memarlıq şöbəsinin müdiri Akif Əliyev, Azərbaycan Respublikası Gənclər və İdman Nazirliyi səlahiyyətliləri, Türk iş adamları və qəsəbə sakinləri iştirak edib.
Tədbirdə açılış nitqi ilə başlayan TİKA Bakı Proqram Koordinatoru Adəm Urfa da Azərbaycanlı gənclərin zərərli vərdişlərdən qorunmasına, ölkənin gələcəyinin möhkəm təməllər üzərində inşa edilməsinə dəstək olacaq təhsil, idman və mədəniyyət sahələrində fəaliyyətlərini bundan sonra da davam etdirəcəklərini bildirib.
Daha sonra çıxış edən Akif Əliyev günümüzdə ölkə rəhbərliyi tərəfindən idmanın inkişafına göstərilən dəstəyini vurğulamış, reallaşdırılan layihənin ölkəmizdə gənclər arasında idman növlərinə və sağlam həyatın təbliğ edilməsi hərəkatına dəstək xarakterli olduğunu qeyd etmişdir.
Səfir Özoral tədbirin yalnız bir stadionun açılması deyil, Türkiyənin və Azərbaycan qardaşlığının başqa bir nümunəsi olduğunu söyləyib. Türkiyə olaraq Azərbaycanın inkişafını görməkdən hər zaman xoşbəxtlik duyduğunu ifadə edən Özoral, bu inkişafa dəstək olmaqdan ayrıca sevinc duyduqlarını qeyd edib.
Özoral bildirib ki, "Türkiyə ilə Azərbaycan iki dövlət, bir millətdir. Türkiyənin gücü Azərbaycanın, Azərbaycanın gücü isə Türkiyənin gücüdür. Birlikdə hər zaman daha güclü və daha irəlidə olacağıq."
Çıxışlardan sonra stadionun açılışını edən Özoral, stadionun ilk başlama vuruşunu edib.
Məlumat üçün bildirək ki, Stadion yatqxanada qalan tələbələr və Aşağı Güzdəkdə yaşayan gənclər tərəfindən pulsuz istifadə ediləcək.
Şamo Əliyev