İyulun 2-də Azərbaycan Polisi Günü və Azərbaycan Polisinin 100 illik yubileyi münasibətilə Abşeron Rayon İcra Hakimiyyətinin təşkilatçılığı ilə tədbir keçirilib.
Yığıncaqda rayon hüquq mühafizə orqanlarının əməkdaşları ilə yanaşı, Abşeron rayon icra hakimiyyətinin başçısı İradə Gülməmmədova və digər rəsmi şəxslər, veteran polislər iştirak ediblər.
Əvvəlcə tədbir iştirakçıları ümummilli lider Heydər Əliyevin adını daşıyan parkda Ulu Öndərin əzəmətli abidəsi önünə gül dəstələri qoyub, xatirəsini ehtiramla yad ediblər.
Abşeron Rayon Mədəniyyət Mərkəzində keçirilən tədbirdə dövlət himni səsləndirilib, torpaqlarımızın müdafiəsində şəhid olmuş və xidməti vəzifələrini yerinə yetirərkən həlak olmuş polis əməkdaşlarının xatirəsi bir dəqiqəlik sükutla yad edilib.
Daha sonra Azərbaycan Respublikasının daxili işlər naziri, general-polkovnik Ramil Usubovun şəxsi heyətə bayram münasibətilə ünvanladığı təbrik məktubu oxunub.
Bayram tədbirində Azərbaycan Polisinin fəaliyyətini əks etdirən videoçarx nümayiş etdirilib.
Tədbirdə çıxış edən Abşeron Rayon İcra Hakimiyyətinin başçısı İradə Gülməmmədova Azərbaycan Polisi Günü münasibətilə hüquq-mühafizə orqanlarının əməkdaşlarını təbrik edərək Azərbaycan polisinin Ulu Öndər Heydər Əliyevin dövlətçilik xəttinə, Möhtərəm Prezidentimiz cənab İlham Əliyevin müdrik siyasətinə həmişə sadiq olduğunu bildirib və bunun daxili işlər orqanlarının əməkdaşları üçün ən böyük şərəf və qürur mənbəyi olduğunu diqqətə çatdırıb.
Azərbaycan polisinin 100 illik şanlı tarixi ərzində şərəfli yol keçərək dövlətçiliyimizin əsas dayaqlarından birinə çevrildiyini, ölkəmizdə müstəqilliyin və daxili sabitliyin təmin olunmasında mühüm rol oynadığını deyən icra başçısı, ölkəmizin sarsılmaz təməllər üzərində formalaşmış ictimai-siyasi sabitlik şəraitində inkişafında, dövlətçiliyin qorunmasında, asayişin mühafizəsində, Konstitusiya ilə təsbit olunmuş insan və vətəndaş hüquq və azadlıqlarının etibarlı təminatında daxili işlər orqanlarının mühüm xidmətlərindən danışıb və ölkə rəhbərliyinin daxili işlər orqanlarına diqqət və qayğısını xüsusilə vurğulayıb.
Digər çıxış edənlər bildiriblər ki, Daxili İşlər Nazirliyinin tərkib hissəsi olan Abşeron rayon polis idarəsi də daim diqqət və qayğı ilə əhatə olunur. Belə ki, 2015-ci ildə Abşeron rayon Polis Şöbəsinə Polis İdarəsi statusu verilmiş, Mehdiabad polis bölməsi yaradılmış, İdarəyə əlavə ştatlar verilmişdir. Əməkdaşların sosial rifahının yaxşılaşdırılması daim diqqət mərkəzində saxlanılır.İdarə əməkdaşları da üzərinə düşən vəzifələrin öhdəsindən layiqincə gəlməyə çalışır, rayon ərazisində ictimai qaydaların qorunması və ictimai asayişin təmin edilməsi istiqamətində xidməti vəzifələrinin icrasına məsuliyyətlə yanaşırlar.
Çıxışlardan sonra xidmətdə fərqlənən bir qrup polis əməkdaşına Abşeron Rayon İcra Hakimiyyətinin başçısı İradə Gülməmmədova tərəfindən fəxri fərman, pul mükafatı və qiymətli hədiyyələr verilib.
Bayram tədbirində muğam müsabiqəsinin qalibi Nigar Şabanova, Əməkdar artist Təyyar Bayramov, "Xalq ulduzu" yarışmasının qalibi Tural Salmanov və digər mügənnilər bir səhnəni bölüşərək Sumqayıt Regional Mədəniyyət idarəsinin Xalq Çalğı Alətləri Orkestrinin müşayiəti ilə Azərbaycan bəstəkarlarının əsərlərini ifa ediblər.
Şamo Əliyev