Abşeron Rayon İcra Hakimiyyətində Latviya Yerli İcra Orqanları İttifaqının sədri Galts Kamiskisin rəhbərlik etdiyi nümayəndə heyəti ilə görüş keçirilib. Görüşdə Abşeron RİH başçısının müavini Fuad Cəbrayılov qonaqları salamlayaraq rayonumuz haqqında məlumat verib. Son 10 il ərzində Abşeronda 50-dən çox bağça və məktəbin tikilərək istifadəyə verildiyini vurğulayan F.Cəbrayılov bu istiqamətdə həyata keçirilən işlərin hazırda da davam etdiyini bildirib.
Rayon ərazisində aparılan quruculuq – abadlıq işlərində yerli bələdiyyələrin rolunu vurğulayan müavin yerli özünü idarə orqanların işlərinin ildən-ilə böyüdüyünü söyləyib.O, qeyd edib ki, Abşeron rayonu Misirin Qalubiyyə, Türkiyənin isə Bursa şəhəri ilə qardaşlaşıb. Bununla əlaqədar olaraq hər parkların yaradıldığını önə çəkən başçının müavini Azərbaycanla Latviya arasında da qarşılıqlı hörmətə əsaslanan yüksək münasibətlərin olduğunu vurğulayıb.
Abşeron rayonunda bir çox məhsulların istehsal edildiyini vurğulayan başçının digər müavini İlham Quliyev qeyd edib ki, rayonumuz artıq 7 ildir ki, dotasiya almadan inkişaf edir. Onun sözlərinə görə, ötən il ən böyük invistisya da məhz Abşeron rayonuna qoyulmuşdur. Rayonumuzda istehsal edilən bir çox məhsullar haqqında məlumat verən İ.Quliyev qeyd edib ki, artıq onların bir qismi xarici bazarlara çıxarılır.
Latviya Yerli İcra Orqanları İttifaqının sədri Galts Kamiskis də ölkəsində Azərbaycan məhsullarının yaxşı tanındığını bildirərək Azərbaycanın surətli inkişafından söz açıb. O qeyd edib ki, Bakıda və Abşeronda gördükləri inkişafdan heyran qalıb.
Ölkəsində merlərin və bələdiyyələrin iş fəaliyyəti barədə məlumat verən G.Kamiskis qarşılıqlı əlaqələrin inkişafından və əldə edilən təcrübələrin mübadiləsinin əhəmiyyətini qeyd edib.
