Bu gün Xırdalan şəhərindəki Heydər Əliyev Mərkəzində “2 fevral – Azərbaycan Gəncləri Günü” münasibəti ilə tədbir keçirilib. Abşeron rayon İcra Hakimiyyəti və rayon Gənclər və İdman İdarəsinin birgə təşkilatçılığı ilə baş tutan tədbirdə iştirakçılar əvvəlcə ümummilli lider Heydər Əliyevin abidəsi önünə gül dəstələri düzərək xatirəsini ehtiramla yad ediblər.
Abşeron rayon İcra Hakimiyyətinin başçısı İradə Gülməmmədova bütün Azərbaycan gənclərini bu əlamətdar bayram günü münasibətilə təbrik edərək, onlara gün-gündən daha da inkişaf edən ölkəmizdə xoşbəxt və firavan gənclik, sağlamlıq və uğurlu gələcək arzulayıb.
Xalqımızın ümummilli lideri Heydər Əliyev tərəfindən 1997-ci ildə “2 fevral – Azərbaycan Gəncləri Günü elan edilməsi haqqında” Sərəncam imzalandığını vurğulayan başçı qeyd edib ki, Ulu öndərin gənclər siyasətinin nəticəsi olaraq gənclər dövlət idarəçiliyinin bütün sahələrində aktiv iştiak etməyə başladılar. O qeyd edib ki, Ulu Öndər Heydər Əliyev daim gənclərə böyük etimad göstərir, onların qüvvəsinə güvənərək vurğulayırdı: “Gənclər cəmiyyətimizin əksəriyyətini təşkil edir, onlar bizim bu günümüz, həm də gələcəyimizdir. Biz, Azərbaycan dövləti, xalqımız gənclərə böyük ümidlə baxırıq”.
Bildirilib ki, Azərbaycan gənclərinin günümüzün müasir, inkişaf etmiş, yüksək intellektli aparıcı qüvvə kimi formalaşmasında ümummilli liderimizin siyasi kursunun ən layiqli davamçısı cənab Prezident İlham Əliyevin rəhbərliyi altında həyata keçirilən gənclər siyasətinin mühüm rolu vardır. Dövlət başçısının bu gün bütün sahələrdə olduğu kimi, gənclər siyasətinin uğurla davam etdirilməsinə xüsusi diqqət göstərdiyi, dövlətin gənclər siyasətinin onun rəhbərliyi ilə yeni mərhələdə daha da inkşaf etdiyini diqqətə çatdırılıb.
Çıxışı zamanı Abşeronda həyata keçirilən gənclər siyasəti və gənclərin sosial vəziyyəti məsələsinə də toxunan icra başçısı qeyd edib ki, bu gün rayonun və ölkənin ictimai-siyasi həyatında rayon gənclərinin göstərdiyi fəallıq onların hazırki səviyyəsinin kifayət qədər yüksək olduğunu söyləməyə əsas verir.
Tədbirdə çıxış edən rayon Gənclər və İdman İdarəsinin rəisi Əsgər Əmiralıyev ötən il rayonda dövlət gənclər siyasətinin icrası istiqamətində görülən işlərdən, həyata keçirilən layihələrdən və qarşıda duran vəzifələrdən danışıb.
Daha sonra, Rayon İcra Hakimiyyəti və Rayon Gənclər və İdman İdarəsinin adından “2 fevral – Azərbaycan Gəncləri günü” münasibəti ilə rayonun ictimai-siyasi həyatında fəal iştirakına görə bir sıra gənclərə fəxri fərman təqdim olunub.
Çıxış edənlərdən Mədəniyyət Nazirliyinin Regional siyasət şöbəsinin əməkdaşı Nicat Şərifov, Bakı Mühəndislik Universitetinin Tələbə Gənclər Təşkilatının sədri Elnur Mirzəyev, Prezident mükafatçısı, Uşu-sanda idman növü üzrə 3 qat avropa çempionu və İslam Həmrəylik oyunlarının gümüş və bürünc mükafatçısı Elçin Eminov, İlin peşakar gənci, Xırdalan 2 nömrəli tam orta məktəbin müəllimi Elnarə Həsənova ölkə Prezidenti cənab İlham Əliyevin rəhbərliyi ilə gənclərə göstərilən qayğıdan danışıblar.
Bayram şənliyində Prezident təqaüdçüləri olan gənc musiqiçilərin ifasında Azərbaycan və dünya bəstəkarlarının əsərlərindən, xalq mahnıları və muğamlarımızdan ibarət proqram təqdim olunub.
Şamo Əliyev
