Abşeron Rayon İcra Hakimiyyətinin başçısı İradə Gülməmmədovanın rayonun Ceyranbatan qəsəbəsindəki sayca 7-ci səyyar qəbul-görüşü keçirilib. Görüşdə hüquq mühafizə orqanlarının, dövlət idarə, müəssisə və təşkilatlarının, xidmət sahələrinin rəhbərləri və qəsəbə sakinləri iştkirak edib.
İ.Gülməmmədova ölkədə və rayon ərazisində həyata keçirilən quruculuq-abadlıq işlərindən danışaraq respublikada həyata keçirilən islahatlardan söz açıb. Azərbaycan Respublikasının Prezidenti cənab İlham Əliyevin kreditlərlə bağlı həyata keçirdiyi siyasətin vətəndaşların sevincinə səbəb olduğunu vurğulayan başçı hökümətin hər zaman xalqın yanında olduğunu bildirib.
Sonra qəsəbə bələdiyyəsinin sədri Cavanşir Zeynalov ərazidə aparılan abadlıq-quruculuq işləri barədə məlumat verərək, əhalini narahat edən problemləri diqqətə çatdırıblar.
Qəbula gələn sakinlər keçən görüşdən sonra qəsəbədə abadlıq-quruculuq işlərinin aparıldığını, qaldırılan problemlərin həll olunduğunu vurğulayaraq bütün bunlara görə ölkə rəhbərliyinə öz təşəkkürlərini bildiriblər. Bununla yanaşı bəzi yeni salınan küçələrin abadlaşdırılması, telefon xəttlərinin çəkilməsi və sairlə bağlı köməklik göstərilməsini xahiş ediblər.
Sakinlər tərəfindən qaldırılan məsələlərin mümkünləri yerindəcə həll olunub, müəyyən vaxt və vəsait tələb edən digər məsələlərin həlli istiqamətində isə müvafiq tapşırıqlar verilib.
