Hörmətli Abşeronlular, əziz balalar!
1 İyun - Uşaqların Beynəlxalq Müdafiəsi Günü dünyanın əksər ölkələrində olduğu kimi, Azərbaycanda da qeyd edilir. 1950-ci il iyunun 1-də BMT Baş Assambleyası tərəfindən Uşaqların Beynəlxalq Müdafiəsi Gününün qeyd olunması qərara alınıb. Azərbaycanda da uşaqların müdafiə olunması, onlara diqqət və qayğının göstərilməsi istiqamətində böyük işlər görülüb. Əsası ümummilli Heydər Əliyev tərəfindən qoyulan bu siyasət hazırda da cənab Prezident İlham Əliyev tərəfindən uğurla davam etdirilir. Uşaqlara dövlət qayğısının gücləndirilməsi, uşaq problemlərinə vətəndaş cəmiyyəti qurumlarının diqqətinin artırılması və ölkənin uşaqlarla bağlı demoqrafik perspektivlərinin müəyyənləşdirilməsi məqsədi ilə 2009-cu il “Uşaq ili” elan olunub. İldən ilə artan diqqətin nəticəsi olaraq ölkəmizdə, eləcə də Abşeronda uşaqların müdafiəsi, onların təhsili, asudə vaxtının təşkili uğurlu şəkildə həyata keçirilmişdir. Birinci vitse-prezident Mehriban xanım Əliyevanın çağırışına uyğun olaraq rayonumuzda neçə-neçə məktəbəqədər təhsil müəssisəsi, orta məktəblər, olimpiya kompleksi tikilərək gül balaların istifadəsinə verilmişdir. Həmin işlər bu gün də davam etdirilməkdədir.
Uşaq barış və sülhdür, uşaq mehribanlıq və səmimiyyətdir, uşaq pozitivlik və gülüş mənbəyidir, uşaq bu günümüz, sabahkı toy-düyünümüzdür, uşaq xoşbəxtlik, arzu və ümidlərdir. O baxımdan, qoy həmişə arzularınız çin olsun. Ümidləriniz gerçəkləşsin ki, gül balalar firavan böyüsün, onlar müharibələr görməsin, güllə səsi eşitməsin. Fidanları hamılıqla qoruyaq ki, sabahımız gülüstana çevrilsin.
Əziz balalar, bayramınız mübarək olsun!
Abşeron rayon İcra Hakimiyyəti
