Abşeron Rayon İcra Hakimiyyətində Kəlbəcərdən olan şəhid ailələrinin üzvləri ilə görüş keçirilib
Tarix:2-04-2015, 19:57
8 avqust 1930-cu ildə inzibati rayon statusu alan Kəlbəcərin Ermənistan silahlı qüvvələri tərəfindən 1993-cü ilin aprel ayının 2-də işğal edilməsindən 22 il ötür Bu münasibətlə Abşeron Rayon İcra Hakimiyyəti başçısının I müavini İradə xanım Gülməmmədova Kəlbəcər rayonundan olan şəhid ailələrinin nümayəndələrini qəbul edib. Əvəlcə vətən uğrunda canından keçmiş Şəhidlərin xatirəsi bir dəqiqəlik sükutla yad olunub.
Daha sonra çıxış edən İradə Gülməmmədova qeyd edib ki, Kəlbəcərin işğalı nəticəsində 511 nəfər həlak olub, 321 nəfər itkin düşüb və girov götürülüb, rayona 761 milyon ABŞ dolları məbləğində ziyan dəyib. Beləliklə, işğal nəticəsində Kəlbəcərin 70 min nəfər əhalisi respublikanın 56 rayonunun 770 yaşayış məntəqəsində müvəqqəti məskunlaşmağa məcbur oldu. Amma artıq o çətin günlər arxada qalıb. Dağlıq Qarabağın və ətrafındakı rayonların işğaldan azad olunması istiqamətində mütəmadi addımlar atılır. Ölkə Prezidenti İlham Əliyev torpaqlarımızın işğaldan azad olunması istiqamətində qətiyyətli siyasət yürüdür. Bununla yanaşı, bu gün qaçqın və məcburi köçkünlərin sosial rifahının yaxşılaşdırılması, onların yaşayış səviyyəsinin normallaşdırılması istiqamətində də məqsədyönlü fəaliyyət nümayiş olunur. Artıq çadır şəhərcikləri ləğv olunub, yeni qəsəbələr salınır. Bu isə bir daha güclü, iqtisadi cəhətdən möhkəm dayaqlara malik Azərbaycan dövlətinin bütün problemlərin öhdəsindən gəlmək iqtidarında olmasını göstərir. Bütün kəlbəcərlilər yaxın zamanda torpaqlarımızın işğaldan azad olunacağına inanır və öz yurd-yuvalarına qovuşacaqları günü səbrsizliklə gözləyirlər.
Məcburi köçkünlər onlara göstərilən diqqət və qayğıya görə Abşeron rayon icra hakimiyyətinin başçısı Zakir Fərəcova minnətdarlıqlarını bildiriblər. Sonda Kəlbəcərli köçkün ailələrinə Abşeron rayon icra hakimiyyəti tərəfindən maddi yardım təqdim olunub.
Qeyd edim ki,hal-hazırda Abşeron rayonunda 1013 Kəlbəcərli məcburi köçkün ailəsi məskunlaşıb