Xırdalan 9 saylı məktəbdə “Narkomaniyaya “Yox” deyək” devizi altında tədbirlər keçirilib
Tarix:5-05-2015, 02:54
Xırdalanda 9 nömrəli tam orta məktəbdə "Narkomaniyaya qarşı mübarizə" mövzusunda tədbir keçirildi.
Tədbiri giriş sözü ilə açan məktəbin direktoru Həcər İbrahimova bildirdi ki, son illərdə dünyada narkotiklərə nəzarət, narkomaniya ilə mübarizə istiqamətində bir sıra ciddi tədbirlər görülür. Ümumbəşəri bir problemə çevrilən narkomaniyanın fəsadlarından söz açıldı. Qeyd edildi ki, narkomaniyaya qurşananlar təhsilə, işə, ailəyə, dostlarına maraqlarını itirir və özlərini cəmiyyətdən təcrid edirlər. Beləliklə də insan həyatı zəhərlənir. Buna görə də ümumbəşəri problemin profilaktikası sahəsində Azərbaycanda da bu cür məqsədyönlü proqramlar həyata keçirilir.
Məktəbin direktor müavini Xavər Hüseyinova qeyd etdi ki, ilk öncə ailə tərbiyə ocağıdır. Ona görə də ailədə və ailədaxili münasibətlərdə sağlam psixopedaqoji mühitin olması çox zəruridir.“Ağ ölüm”lə mübarizədə gənclər arasında maarifləndirmə işinin aparılması və bu sahədə təhsil müəssisələrinin, kitabxanaların, idman təşkilatlarının və ictimaiyyətin rolu böyükdür.Belə vasitələr orqanizmdə təkcə fəsadlar törətmir, həm də bir sıra xəstəliklərə yol açır və gələcək nəslin sağlamlığı üçün ciddi təhlükə yaradır. Bu baxımdan belə tədbirlərin keçirilməsi mühüm əhəmiyyət kəsb edir.