Vergilər Nazirliyi tərəfindən vergi sistemində şəffaflığın təmin edilməsi, vergi orqanlarında idarəetmə prinsiplərinin yenidən təşkili və müasir vergi inzibatçılığının formalaşdırılması, vergi ödəyiciləri ilə vergi orqanları arasında qarşılıqlı etimadın yüksəldilməsi istiqamətində müəyyən işlər görülür.
Qeyd olunan məsələlərin birbaşa vergi ödəyicilərinə çatdırılması və ərazi vergi orqanlarının əməkdaşlarına müvafiq tapşırıqların verilməsi məqsədilə nazirliyin rəhbər vəzifəli şəxsləri regionlara ezam ediliblər. Martın 5-dən 9-dək Vergilər Nazirliyinin bütün ərazi vergi orqanlarında, nazirlik yanında Milli Gəlirlər Departamenti, Bakı şəhəri Lokal Gəlirlər Departamenti və Bakı şəhəri Kiçik Sahibkarlıqla İş Departamentində sahibkarlarla görüşlərin keçirilməsi nəzərdə tutulur.
Martın 7-də Sumqayıt şəhərindəki Heydər Əliyev Mərkəzində növbəti görüş keçirilib. Görüşdə 2 saylı Ərazi Vergilər Departamentinin əhatə etdiyi bölgələr - Sumqayıt şəhəri, Abşeron, Xızı və Siyəzən rayonlarından olan sahibkarlar və vergi ödəyiciləri iştirak ediblər.
Tədbirdə çıxış edən vergilər nazirinin müşaviri Manaf Bayramov vergi ödəyicilərinə bildirib ki, vergi inzibatçılığında baş vermiş dəyişikliklərin mahiyyətinin iş adamlarına çatdırılması məqsədilə cari ilin əvvəlindən genişmiqyaslı maarifləndirmə və məlumatlandırma təbirləri həyata keçirilməkdədir. Bu məqsədlə bütün vergi ödəyicilərinin elektron ünvanlarına məktublar göndərilir, izahlı praktiki vəsait və bukletlər hazırlanaraq Vergilər Nazirliyinin internet saytında, sosial şəbəkələrdə və digər kütləvi informasiya vasitələrində yerləşdirilir.
Görüşdə sahibkarların “Nağdsız hesablaşmalar haqqında” Qanunun tətbiqi, gəlirlərin və xərclərin uçotunun aparılması ilə bağlı yeni qəbul edilmiş qaydalar, əldə edilən malların, iş və xidmətlərin sənədləşdirilməsi, uçotun şəffaflığının təmin edilməsi ilə bağlı ortaya çıxan suallar cavablandırılıb.
