“Əmlakını qeydiyyata al və mülkiyyətinə sahib ol” kampaniyası çərçivəsində bu həftə Masazır qəsəbəsində vətəndaşlara qeydiyyat xidmətləri göstəriləcək.
Əmlak Məsələləri Dövlət Komitəsi tərəfindən bu həftə səyyar qeydiyyat xidmətləri sentyabrın 3-dən 6-dək Abşeron rayonu, Masazır qəsəbəsi, Əliağa Vahid küçəsi 798 (Əliağa Vahidin heykəli və “Zirvə” İdman klubunun yanında) ünvanında qəsəbə sakinlərinə xidmət göstərəcək. Vətəndaşlar əlavə vaxt itirmədən elə ünvanlardaca yaşayış evləri, bağ evləri, həyətyanı torpaq sahələri və digər daşınmaz əmlakların qeydiyyatı ilə bağlı səyyar ofisə müraciət edə bilər.
Sosial aksiya çərçivəsində qeydiyyat xidmətlərinin göstərilməsi ilə bərabər, vətəndaşlara hüquqi məsləhətlər verilir və onları maraqlandıran suallar cavablandırılır. Eyni zamanda sakinlərə elektron çıxarışın əldə edilməsi və ondan istifadə qaydaları, tələb olunan sənədlər, xidməthaqqı və dövlət rüsumu barədə məlumat verilir.