Azərbaycan Ordusunun parlaq tarixi qələbələrindən olan şanlı Aprel döyüşlərinin ikinci ildönümü ilə əlaqədar Abşeron rayonunun məktəbəqədər təhsil müəssisələrində silsilə tədbirlər keçirilir.
Xırdalan şəhər 27 saylı körpələr evi-uşaq bağçasına keçirilən tədbir torpaqlarımızın azadlığı və bütövlüyü uğrunda şəhid olan Vətən övladlarının, o cümlədən Aprel döyüşləri şəhidlərinin ruhunun bir dəqiqəlik sükutla yad etməklə başlayıb.
Mərasimdə çıxış edən məktəbəqədər təhsil müəssisəsinin müdiri Samirə Məmmədova iki il əvvəl məlum aprel hadisələri zamanı Azərbaycan əsgərinin göstərdiyi rəşadətdən, tarixə yazdığı qəhrəmanlıqdan söz açaraq bildirib ki, bu hadisələr bir daha sübut etdi ki, Müstəqil Azərbaycanımızın memarı Ulu Öndər Heydər Əliyevin təməlini qoyduğu rəşadətli Azərbaycan Ordusu artıq Azərbaycan Respublikasının rəhbəri, Ali Baş Komandan cənab İlham Əliyevin rəhbərliyi ilə öz torpaqlarını düşmən tapdağından azad etməyə hər an hazırdır və hər bir Azərbaycan vətəndaşı bu anı səbirsizliklə gözləyir.
Qeyd olunub ki, həm peşəkarlıq, həm də vətənpərvərlik ruhu baxımından Aprel döyüşləri bir daha göstərdi ki, Azərbaycan xalqı qəhrəman xalqdır. Aprel döyüşlərinin ən böyük tarixi əhəmiyyəti bu qələbə sayəsində "Böyük Qayıdış" prosesinə start verilməsi oldu. Lələtəpə yüksəkliyinin azad edilməsi nəticəsində Cəbrayıl rayonunun Cocuq Mərcanlı kəndində mülki əhalinin yaşayışı üçün təhlükə tamamilə aradan qaldırıldı.
Daha sonra bağçanın tərbiyəçiləri – Gülü Mehdiyeva, Vüsalə Babayeva və Könül Məsiyeva Aprel döyüşlərində şəhid olmuş qəhrəmanlar haqqında uşaqlara geniş məlumat veriblər.
Tədbirdə bağçanın məktəbə hazırlıq qrupunun körpə fidanları hərbi-vətənpərvərlik mövzusunda şeirlər, mahnılar söyləyib, müxtəlif səhnəciklər nümayiş etdiriblər.
Şamo Əliyev
