Fövqəladə Hallar Nazirliyinin Sumqayıt Regional Mərkəzi 15 noyabr 2018-ci il tarixində Xırdalan şəhər 23 saylı körpələr evi-uşaq bağçasında “Uşaq hüquqları aylığı” çərçivəsində “Fövqəladə hallarla bağlı davranış və yanğın təhlükəsizliyi qaydaları” mövzusunda maarifləndirmə tədbiri keçirib.
Tədbirin keçirilməsində məqsəd tərbiyəçi müəllim və uşaqların fövqəladə hallarla bağlı davranış qaydaları və mülki müdafiə sahəsində biliklərinin artırılmasına, bağçalarda baş verə biləcək yanğın və ya partlayış hadisələrinin qarşısının alınması məqsədilə profilaktik tədbirlərin görülməsinə nail olmaqdır.
Toplantıda Sumqayıt Regional Mərkəzinin, I ərazi Dövlət Yanğın Nəzarəti İdarəsinin, Abşeron rayon Dövlət Yanğından Mühafizə Hissəsinin, Abşeron rayon İcra Hakimiyyətinin əməkdaşları, bağçanın tərbiyəçi müəllimələri və uşaqlar iştirak ediblər.
Əvvəlcə, bağçada təhsil alan uşaqların əl işləri nümayiş olunub.
Nəzəri və praktiki olmaqla iki hissədən ibarət olan tədbirin I hissəsində Mərkəzin əməkdaşları “Fövqəladə halların təsnifatı”, “Zəlzələ zamanı necə davranmalı?”, “Torpaq sürüşməsi zamanı davranış qaydaları”, “Məişətdə yanğın zamanı davranış qaydaları”, “Odsöndürən balonlardan istifadə”, “Dəm qazı”, “Çimərliklərdə təhlükəsizlik qaydaları” və “112” qaynar xətti” mövzularında məlumat veriblər.
Daha sonra suallar cavablandırılıb və maarifləndirmə xarakterli təbliğat materialları, yaddaş kitabçaları, bukletlər paylanılıb.
“Uşaq Hüquqları Konvensiyası” barədə, eləcə də uşaq hüquqlarının qorunması və təşviqi sahəsində ölkəmizdə həyata keçirilən tədbirlərdən danışan Mərkəzin Maarifləndirmə sektorunun rəhbəri Emin Ramazanov və bağçanın müdiri Aybəniz Sadıqova, azyaşlıların, uşaq və yeniyetmələrin fövqəladə hallara hazırlanması, onlara belə vəziyyətlərdə necə hərəkət etməsini aşılamağın diqqət mərkəzində saxlanılan məsələlərdən olduğunu qeyd ediblər
Çıxışlardan sonra Fövqəladə Hallar Nazirliyinin hazırladığı “Uşaqları çimərlikdə nəzarətsiz qoymayın” və “Uşaqlarımızın həyatını təhlükəyə atmayaq” adlı videoçarx nümayiş olunub.
Tədbirin praktiki hissəsində şərti olaraq bağçanın həyətində süni yanğın səhnəsi təşkil edilərək Abşeron rayon Dövlət Yanğından Mühafizə Hissəsinin əməkdaşları tərəfindən baş verən yanğın lokallaşdırılaraq söndürülüb.Həmçinin Abşeron rayon Dövlət Yanğından Mühafizə Hissəsinin qüvvə və texnikasına baxış keçirilib, onların təyinatı və istifadəsi qaydaları haqqında məlumat verilib.
Sonda bağçanın tərbiyəçisi Vüsalə Nəsibovanın təşkilatçılığı, rus bölməsi üzrə məktəbəhazırlıq qrupunun körpə fidanlarının iştirakı ilə hazırlanmış ədəbi-bədii hissə nümayiş olunub.
