Sumqayıt Regional Mədəniyyət İdarəsinə tabe olan Abşeron rayon Mərkəzi Kitabxana Sistemi (MKS) “Xan qızı Natəvan” adlı ədəbi məclisi ilə birgə “Sən şəhid anasısan” adlı tədbir təşkil edib. Kitabxanada keçirilən tədbir Vətən uğrunda şəhid olan igid qəhrəmanların xatirəsini bir dəqiqəlik sükutla yad etməklə başlayıb.
Sumqayıt Regional Mədəniyyət İdarəsinin məsləhətçisi, “Şəhid Analarına Dəstək” İctimai Birliyinin sədri, Aprel döyüşləri şəhidi Əbdülməcid Axundovun anası Ceyran Həsənova, MKS-nin direktoru Məlahət Abdullayeva çıxış ediblər. Tədbirdə iştirak edən şəhid anaları qəhrəman oğulları ilə bağlı xatirələrini bölüşüblər.
“Xan qızı Natəvan” və “Od parçası” ədəbi məclislərinin rəhbərləri Məlahət Yusifqızı, üzvlərdən Xalq artisti, Qarabağ döyüşlərinin iştirakçısı Şükufə Musayeva, Qarabağ döyüşçüsü şair Hümbət Məmmədov və digərləri şəhidlərə həsr etdikləri şeirlərdən parçalar səsləndiriblər.
Şəhid anaları belə görüşlərin yeniyetmə və gənclərə örnək, şəhid ailələrinə təsəlli olduğunu vurğulayıblar.
